Wikileaks-ի հիմնադիր Ջուլիան Ասանժը մտադիր չէ լքել Լոնդոնում Էկվադորի դեսպանատունը, քանի դեռ ԱՄՆ-ի իշխանությունները չեն դադարեցրել իր ստեղծած կայքի «անբարոյական» հետապնդումը: Այս մասին նա հայտարարել է ամերիկյան CNN հեռուստաալիքին տված հարցազրույցում:
41-ամյա Ասանժը, որ Լոնդոնում Էկվադորի դեսպանատանն է այս տարվա հունիսի 19-ից, իր այնտեղ գտնվելը համեմատել է տիեզերական կայանի վրա ապրելու հետ:
Ավելի վաղ նա ասել է, որ աշխատում է օրական 17 ժամ և ակտիվորեն ֆիզիկական վարժություններ է անում, որպեսզի առողջական վիճակը չվատանա:
Ասանժը հայտնի դարձավ 2010-ին, երբ իր հիմնադրած կայքում ԱՄՆ Պետդեպարտամենտի գաղտնի փաստաթղթեր հրապարակեց:
Հինգշաբթի օրը Wikileaks-ը սկսել է հրապարակել ԱՄՆ-ի պաշտպանության նախարարության փաստաթղթեր, որոնք նկարագրում են Իրաքում դատապարտյալների հետ վարվելու ցուցումները:
