Հայաստան-USAID–ի (ԱՄՆ Միջազգային զարգացման գործակալություն) կողմից ֆինանսավորվող «Ձեռնարկությունների զարգացման և շուկայի մրցունակության» ծրագիրը ս.թ. հոկտեմբերի 24-ին կազմակերպել էր «Նոր հնարավորություններ փոքր բիզնեսի ֆինանսավորման համար» խորագրով միջոցառումը: Միջոցառմանը ներկա էին ծրագրի գործընկեր ֆինանսական հաստատությունները (Արարատբանկ, Յունիբանկ, Հայբիզնեսբանկ, Գուդ Կրեդիտ ունիվերսալ վարկային կազմակերպություն), ինչպես նաև ՀՀ կառավարության և Հայաստանում միջազգային կազմակերպությունների ներկայացուցիչներ:
Մասնակիցները քննարկեցին մի շարք հարցեր, այդ թվում` փոքր և միջին ձեռնարկությունների ֆինանսական հասանելիության բարձրացման նպատակով ֆինանսական ոլորտի ներուժի հզորացումը, հաճախորդների ֆինանսական իրազեկման բարձրացումը, ինչպես նաև մոտ ապագայում փոքր և միջին ձեռնարկությունների կողմից ինովացիոն վարկային պրոդուկտներից օգտվելու նոր հնարավորությունները:
USAID–Հայաստան առաքելության տնօրենի ժամանակավոր պաշտոնակատար Քոնան Փեյսենը և ՀՀ ԿԲ փոխնախագահ Ներսես Երիցյանը ելույթ ունեցան` շեշտելով ՓՄՁ-ներին տրամադրվող աջակցության կարևորությունը Հայաստանում նորարարության և տնտեսական զարգացման խթանման գործում:
Միջոցառման վերջում գործընկեր ֆինանսական հաստատությունների շուրջ 60 վարկային մասնագետներին և վերլուծաբաններին հանձնվեցին վկայագրեր §Ի-Դի-Էմ-Սի¦ ծրագրի կողմից կազմակերպված §Ֆինանսական վերլուծություն¦ թեմայով դասընթացը հաջող ավարտելու կապակցությամբ:
2011թ. մեկնարկից ի վեր, «Ի-Դի-Էմ-Սի» ծրագիրը տրամադրում է տեխնիկական աջակցություն գործընկեր ֆինանսական հաստատություններին` ծրագրի թիրախային ոլորտներում գործունեություն ծավալող ՓՄՁ-ներին տրամադրվող վարկային ծառայությունների բարելավման և առկա բացերի հաղթահարման նպատակով, այդ թվում` նոր ֆինանսական պրոդուկտների մշակումը, ռիսկերի կառավարումը, հաճախորդների իրազեկումը և վարկային վերլուծության գործընթացի արդյունավետության բարձրացումը:
