Լիբանանի նախագահը երկրում կայունություն հաստատելու նպատակով բանակցություններ է սկսել «Մարտի 14»-ի և «Մարտի 8»-ի ուժերի հետ: Այս մասին այսօր «Առաջին լրատվական»-ի հետ զրույցում ասաց Լիբանանի Հնչակյան կուսակցության վարիչ մարմնի ատենապետ Ալեքսան Քեոշքերյանը՝ ներկայացնելով Լիբանանում օրեր առաջ տեղի ունեցած պայթյունից հետո երկրում ստեղծված քաղաքական իրավիճակը:
Ըստ բեյրութահայի՝ երկրում քաղաքական իրավիճակը լարված է, բայց փոքր-ինչ մեղմվել է: Նրա խոսքով՝ Լիբանանի նախագահ Միշել Սուլեյմանը քաղաքական բանակցություններ է սկսել:
«Իրավիճակն այսպիսին է. Բեյրութում փողոցային բախումներ չկան, Տրիպոլիում վարչապետի տան առջև նստացույց էր սկսվել, բայց այսօր վարչապետը երկրում չէ:
Այսօր լարվածությունը քաղաքական ասպարեզում է: «Մարտի 14»-ի ուժերը չեն ուզում խորհրդարանական հանձնաժողովների աշխատանքներին մասնակցել: Նախագահն առանձին-առանձին հրավիրում է «Մարտի 8»-ի և «Մարտի 14»-ի ուժերին` նրանց հետ զրուցելու, երկիրը լարված վիճակից դուրս բերելու խորհրդակցություններ անցկացնելու նպատակով:
Նախագահի հետ հանդիպման ժամանակ «Մարտի 14» ուժի ներկայացուցիչ, նախկին վարչապետն ասել էր, որ չեն մասնակցելու խորհրդարանական հանձնաժողովների աշխատանքներին»,- իրավիճակը ներկայացրեց Լիբանանի Հնչակյան կուսակցության վարիչ մարմնի ատենապետը:
Նա տեղեկացրեց, որ Լիբանանում հայերը բաժանված են երկու խմբի՝ ընդդիմադիր և իշխանական:
«Ներքին իմաստով հայերը ոչ մի խնդիր չունեն, որովհետև հայկական կուսակցությունների ղեկավարները հաճախակի հանդիպում են իրար հետ, որպեսզի հայ համայնքը մնա միասնական և միահամուռ` անկախ քաղաքական տարակարծություններից: Մենք փորձում ենք հնարավորինս չմիջամտել այս փողոցային դեպքերին, բախումներին և լարվածություններին»,- պարզաբանեց Լիբանանի Հնչակյան կուսակցության վարիչ մարմնի ատենապետ Ալեքսան Քեոշքերյանը:
Հիշեցնենք, որ հոկտեմբերի 19-ին Բեյրութի քրիստոնեական թաղամասերից մեկում ահաբեկչություն էր տեղի ունեցել, որի հետևանքով զոհվել էր գնդապետ Ուիսամ Ալ-Հասանը: Ահաբեկչությունից հետո երկրում իրավիճակը սրվել է:
