«Մենք չենք կարող ներքին դեմոկրատիա չունենալ, բայց դրսում ինտեգրվել դեմոկրատական կառույցներին: Ըստ երևույթին, ուզում ենք արտաքին դեմոկրատական գործոնները տեղավորել ներքին կյանքի վրա, դրսից բերել դեմոկրատիան, որովհետև ներսից չենք կարողանում: Իհարկե, սա կատակ եմ անում: Իհարկե, մենք հասկանում ենք, որ պետք է լինեն դեմոկրատական կարգեր»,- «Կենտրոն» հեռուստաընկերության «Ուրվագիծ» հաղորդման եթերում ասել է ՀՀ արտակարգ և լիազոր դեսպան Արման Նավասարդյանը:
Նա քննադատել է ՀՀ արտգործնախարարության գործունեությունը: Դեսպանը նշել է, որ պետք արտաքին քաղաքականությունը նպաստի ներքին քաղաքականությանը, այնինչ մեր ԱԳ նախարարությունը կենտրոնացել է ղարաբաղյան խնդրի և հայ-թուրքական հարաբերությունների վրա՝ աչքաթող անելով մյուս հարցերը: Իսկ ողջ աշխարհում քաղաքականությունից առաջ դիվանագիտությունը զբաղվում է առևտրատնտեսական հարաբերություններով: ՛
«Դիվանագիտությունը պետք է մեծապես նպաստի բիզնեսի զարգացմանը: ԱԳՆ-ն պարտավոր է նպաստել քո երկրում և երկրից դուրս բոլոր ոլորտների զարգացմանը»,- ասել է դեսպանը: Նա բացասական է համարել, որ ԱԳՆ-ը չունի հաշվետվություն ժողովրդի առաջ և չի երևում, թե 300 հոգանոց կոլեկտիվն ինչով է նպաստում մեր ներքին խնդիրների լուծմանը:
Արման Նավասարդյանը նշել է, որ վերջերս երկու հայտարարություն արեցին ԱՄՆ և ՌԴ դեսպանները, առաջինը՝ Վարդան Օսկանյանի մասով, երկրորդը՝ արտագաղթի՝ երկուսն էլ մեղադրելով ՀՀ իշխանություններին: Բանախոսը դա համարել է սխալ քայլ. «Նախ այդ երկու դեսպանների հայտարարությունն էլ Վիեննայի 1961 թ. Դիվանագիտական հարաբերությունների վերաբերյալ կոնվենցիայի միանշանակ խախտում է, կոչվում է մեր ներքն գործերին խառնվել: Դա ուրիշ երկրի դեսպանի գործը չէ: Սա այն քաղաքականությունն է, որ թույլ տվեց իրեն իր նախորդը՝ Մարի Յովանովիչը: Սրանից մեկ տարի առաջ նա պետհամալսարանում անվանարկեց մեր իշխանություններին, թե ինչու են երկարաձգել ռուսական ռազմակայանների գոյությունը Հայաստանւոմ: Նման պայմաններում նրան ուղղակի պետք էր «անցանկալի անձ» հայտարարել: Իսկ մեր ԱԳՆ-ն համեստ հարսի պես լռեց»:
Արման Նավասարդյանը նշել է, որ ԱՄՆ դեսպանն իրեն պահել է տեխասցի կովբոյի պես, իսկ Հայաստանը նման պայմաններում պետք է չկորցներ ազգային դիմագիծը, չիջեցներ պետականության նշաձողը:
