«Ինձ և մեր քաղաքական ուժի համար խնդիրը միասնական ցուցակը չէ, այլ միավորված ընդդիմադիր դաշինքը. հույս ունեինք, որ ընդդիմադիր դաշինքը կլցնի ընդդիմության միավորման բացը: Բայց այն, ինչ տեղի ունեցավ, զուրկ էր քաղաքականության կանոններից»,- «Ժառանգություն» և «Ազատ դեմոկրատներ» կուսակցությունների խորհրդարանական համատեղ գործունեության դադարեցման վերաբերյալ «Արմնյուզ» հեռուստաընկերության «Բանաձև» հաղորդման եթերում նման տեսակետ է հայտնել «Ազատ դեմոկրատներ»-ի փոխնախագահ Անուշ Սեդրակյանը:
Նրա խոսքերով՝ եթե չկան բանսարկություններ, թաքուն բանակցություններ, քաղաքական գծից շեղումներ և այլն, մնացած դեպքերում միությունը փլուզելը քաղաքականության հետ կապ չունի: «Մենք հնարավոր և անհնար ամեն ինչ արեցինք կանխելու սա: Մենք փորձեցինք նախ մեղմել մեր բոլոր պատասխան հայտարարությունները, լինել զուսպ, քաղաքականության շրջանակներում: Մենք կարող ենք տալ կոշտ պատասխան, բայց մենք վախենում ենք դրանով հեղինակազրկել ընդդիմադիր դաշտը»,- ասել է կուսակցության փոխնախագահը:
Ի վերջո, մանդատները վայր դնելու վերաբերյալ պայմանավորվածություն եղե՞լ է արդյոք երկու առաջնորդների միջև. այս հարցին Անուշ Սեդրակյանը կոնկրետ պատասխան չի տվել` ասելով. «Լավագույն պայմանավորվածությունը, որ կարող է լինել մանդատների վերաբերյալ, դա ԿԸՀ ներկայացված ցուցակն է»: Նա նաև շեշտել է, որ լավ դասավորության դեպքում «Ժառանգության» ցուցակն առավել ձայներ կարող էր ստանալ:
«Ազատ դեմոկրատներ»-ի փոխնախագահը նշել է, որ Րաֆֆի Հովհաննիսյանը համատեղ ցուցակի բոլոր ներկայացուցիչներից պահանջել է գրել ինքնաբացարկի դիմում, ապա ցուցակը վերակազմավորել, սակայն իրենց կուսակցության վարչության մայիսի 13-ի նիստում հայտարարություն է ընդունվել վերադասավորում չանելու մասին: «Ժառանգության» հետ նախընտրական բանակցություններից ևս որոշ փակագծեր բացել է Սեդրակյանը. «Մենք փորձում էինք ամեն կերպ այս վերադասավորումների միջով անցնել, մենք քննարկեցինք շատ կետեր, որ հրաշալի կլիներ, որ ցուցակի ավելի անցողիկ տեղերում լինեն ոչ թե «Ազատ դեմոկրատներ»–ի, այլ «Ժառանգության» ազդեցիկ նեկայացուցիչներ»:
Ա. Սեդրակյանը հիշեցրել է «Ժառանգությանը», որ ընդդիմադիր դաշտն ունի շատ խնդիրներ, և ընդդիմությունն իավունք չունի անձնական հողի վրա հուսախաբ անել ընտրողին: Մնացածին էլ հիշեցրել է, որ «Ազատ դեմոկրատներ»-ը նոր կուսակցություն է, բայց իրենց անդամներից որևէ մեկն առանց քաղաքական կենսագրության չի մտել դաշտ. «Նրանք քաղբանտարկյալ էին, իսկ նախկին քաղբանտարկյալ լինելը քաղաքական կապիտալ է»:
