Ամերիկյան Sikorsky ընկերությունը սկսել է S-97 Raider բարձր արագությամբ համակցված հետախուզական ուղղաթիռի երկու նախատիպերի հավաքումը: Այդ ուղղաթիռների մշակումն իրականացվում է ամերիկյան բանակի հետաքրքրությունների շրջանակում: Այս մասին հաղորդում է Flightglobal-ը:
Sikorsky-ի ներկայացուցչի խոսքով՝ նախատեսվում է ուղղաթիռների հավաքումն ավարտին հասցնել 2013-ի կեսերին: Ուղղաթիռների առաջին փորձարկումները կսկսվեն 2014-ին:
S-97 Raider ուղղաթիռը մշակվում է գերարագ X2 նախատիպի հիմքի վրա: Այն ունի նույնառանցք երկու պտուտակներ, հետնամասում՝ հրող պտուտակ, և փոքր թևեր՝ վերամբարձ ուժի ստեղծման համար:
Մշակողների գնահատմամբ՝ ուղղաթիռը կարող է զարգացնել ժամում ավելի քան 460 կմ արագություն:
Ամերիկյան բանակում S-97 Raider-ները կարող են փոխարինել հնացած հետախուզական Bell OH-58 Kiowa Warrior ուղղաթիռներին, որոնք մնացել են դեռևս վիետնամական պատերազմի տարիներից:
