Թուրքական Haberler.Com կայքի փոխանցմամբ՝ Իսրայելն անակնկալ առաջարկ է արել Թուրքիային: Անկարայում Իսրայելի նախկին դեսպան, Իսրայելի ԱԳՆ-ի գլոբալ և ռազմավարական հարցերով պատասխանատու Փինհաս Ավիվին Երուսաղեմում հանդիպել է թուրք լրագրողների հետ:
Հանդիպման ժամանակ Ավիվին հայտարարել է, որ Իսրայելը պատրաստ է Թուրքիայի հետ իր հարաբերությունները կարգավորելու համար առանց նախապայմանների նստել բանակցային սեղանի շուրջ: Դա նաև վերաբերում է Սիրիայում տիրող իրավիճակին:
Ավիվին ընդգծել է, որ Սիրիայում տիրող իրավիճակն ազդում է թե՛ Իսրայելի, թե՛ Թուրքիայի ապագայի վրա, ինչի համար անհրաժեշտ է, որ Թուրքիան ու Իսրայելը բանակցային սեղանի շուրջ քննարկեն սիրիական զարգացումները: Նա հավելել է, որ անհրաժեշտ է ձևավորել հատուկ մեխանիզմ, որը կփոխարինի երկու երկրների չինովնիկների կողմից մամուլի միջոցով արված խիստ հայտարարություններին:
Անդրադառնալով «Մավի Մարմարայի» միջադեպին՝ Ավիվին դա որակել է որպես «սուննի ճգնաժամ»՝ ընդգծելով, որ դա տեղի է ունեցել երկու երկրների սխալների արդյունքում, և այսուհետ պետք է հարաբերությունների կարգավորման համար առանց նախապայմանների նստել բանակցային սեղանի շուրջ և լուծել խնդիրները: Նա ընդգծել է, որ Թուրքիայի հետ հարաբերությունները կարևոր են Իսրայելի համար:
Հիշեցնենք, որ Թուրքիան Իսրայելի հետ իր հարաբերությունների կարգավորման համար 3 նախապայման է ներկայացրել Իսրայելին. «Մավի Մարմարայի» միջադեպի կապակցությամբ ներողություն խնդրել, փոխհատուցում վճարել և Գազայի հատվածի ծովային շրջափակումը վերացնել:
