Երեկ Մոսկվայում տեղի է ունեցել Ռուսաստանի Դաշնության նախագահ Դմիտրի Մեդվեդևի և ԱՄՆ փոխնախագահ Ջո Բայդենի հանդիպումը: Բայդենը Ռուսաստան է ժամանել մարտի 9-ին: Նա մի շարք հանդիպումներ կունենա երկրի բարձրագույն ղեկավարության և ընդդիմության ներկայացուցիչների հետ:
Բայդենը հայտարարել է, որ ռուս-ամերիկյան հարաբերությունները ամերիկյան ներկայիս վարչակազմի առաջնահերթությունների շարքում են. «Մի քանի տարի շարունակ, երբ ես Սենատի արտաքին հարաբերությունների հանձնաժողովի անդամ էի, կարծում էի, ինչպես և նախագահ Բարաք Օբաման, որ մեր հարաբերությունները սխալ ուղղությամբ էին զարգանում: Եվ արտաքին քաղաքական հարցերին վերաբերող առաջին ելույթը, որ ես ունեցա Օբամայի ընտրվելուց հետո, Մյունխենում իմ ելույթն էր, որում խոսքն այն մասին էր, որ եկել է ռուս-ամերիկյան հարաբերությունների վերաբեռնավորման ժամանակը, և անհրաժեշտ է սեղմել վերաբեռնավորման կոճակը: Այդ ֆրազը ես ասել եմ այն ժամանակ»,- հիշեցրել է Բայդենը: Այս մասին գրում է RBC-ն:
«Կային թերահավատներ, որոնք պնդում էին, թե մեր հարաբերություններում առաջընթաց չի լինի Օբամայի կառավարման առաջին երկու տարիներին: Սակայն մենք ապացուցեցինք, որ նրանք սխալ են, և առաջին երկու տարվա մեջ մեր հարաբերություններում առաջընթաց արձանագրվեց: Եվ այդ առաջընթացը ոչ միայն հարձակողական սպառազինությունների կրճատման մասին պայմանագրում էր, այլ նաև Կորեայի, Աֆղանստանի, Իրանի հարցերում, ինչպես նաև շատ այլ կարևոր ուղղություններով»,- հայտարարել է ԱՄՆ փոխնախագահը:
Նախագահ Մեդվեդևը բարձրացրել է տնտեսական հարաբերությունների հարցը` նշելով, որ դրանք զգալի հետ են մնում քաղաքական հարաբերություններից: «Այդ առումով մեզ, անշուշտ, խանգարում է Ռուսաստանի՝ Առևտրի համաշխարհային կազմակերպությանը չանդամակցելը: Հուսով եմ, որ ԱՄՆ-ի գործուն մասնակցությամբ այս տարի այդ գործընթացը (անդամակցության.– 1in.am) կավարտվի»,- ասել է Մեդվեդևը:
Բանակցությունների ընթացքում ԱՄՆ փոխնախագահ Բայդենը նշել է, որ կողմ է, որպեսզի վերացվեն դեռ խորհրդային ժամանակներում ԱՄՆ կողմից ընդունված Ջեկսոն-Վենիկի այսպես կոչված փոփոխությունները, որոնք սահմանափակում էին առևտրային հարաբերությունները սոցիալիստական բլոկի երկրների և ԱՄՆ-ի միջև: Նախկին ԽՍՀՄ հանրապետություններից այդ սահմանափակումը վերացված է միայն Հայաստանի, Ուկրաինայի և Ղրղզստանի համար: