Հայաստանի պետական ֆիլհարմոնիկ նվագախմբի (ՀՊՖՆ) հրավերով Երևանում է աշխարհահռչակ երաժիշտ Միշել Լեգրանը, ով վաղը «Արամ Խաչատրյան» համերգասրահում Երևանյան 6-րդ միջազգային երաժշտական փառատոնի շրջանակում կղեկավարի նվագախումբը՝ կատարելով իր ստեղծագործություններն ու երգերը՝ «Մեկ անգամ ամռանը», «Դինգոյի ողբը», «42-ի ամառը», «Շերբուրգյան հովանոցներ», «Իմ սրտի հողմաղացները», «Ընտանեկան ֆուգո»:
Համերգին հանդես կգան նաև Լեգրանի կինը՝ Փարիզի օպերային թատրոնի մենակատար, տավիղահար Քեթրին Միշելը, Նիկողայոս Վարդանյանը (ակուստիկ բաս), Նարեկ Խեչումյանը (հարվածային գործիքներ):
ՀՊՖՆ-ն մեծ կոմպոզիտորի ամենահայտնի գործերի կատարմամբ կշնորհավորի մաեստրոյի ծննդյան 80-ամյակը: Ինչպես լրագրողների հետ հանդիպմանը խոստովանեց երաժիշտը, ինքն իր ուսերին չի զգում տարիների բեռը, ու ծննդյան տոնակատարությունները իրեն չեն հետաքրքրում, քանի որ «դա մի պահ է, որն անցնում է»՝ չհամաձայնելով Ժան Գաբենի այն դիտարկման հետ, թե ծերությունը զարդարում է մարդուն:
250 ֆիլմերի սաունդթրեքերի, 800 երգի ու բազմաթիվ ձայնասկավառակների օսկարակիր հեղինակը հիմա էլ լի է եռանդով ու աշխատասիրությամբ: Ընդամենը 10 օր առաջ Ճապոնիայից վերադարձած երաժիշտը, ում երջանկության բանաձևն իր ողջ կյանքը երաժշտությանը նվիրելու մեջ է, խոստովանում է, որ հպարտ է նրանով, ինչ արել է: Նա դժվարացավ որևէ նախընտրելի, սիրված ստեղծագործություն առանձնացնել՝ դրանք համարելով իր երեխաները: «Կա լավ ու վատ երաժշտություն, ինձ համար չկա պակաս կարևոր կամ ոչ կարևոր երաժշտություն»,- ասաց նա:
Լեգրանը վերջերս է Ջոն Նոյվեերի համար գրել իր առաջին բալետը՝ «Լիլյոմը», նախատեսում է 2 տարի անց գրել ևս մեկը: Ջոն Լյուսիսի՝ «իր մեծ բարեկամի» հետ կոմպոզիտորը կավարտի երաժշտական ֆիլմի համար գրված ստեղծագործությունը: Ներկայում Լեգրանը կոմպոզիտոր Վլադիմիր Սպիվակովի պատվերով գրում է ստեղծագործություն, պատվերներ ունի Ֆիլադելֆիայի նվագախմբից, երգում է, ֆիլմեր է նկարահանում:
«Շատ աշխատանք կա անելու, բայց ես ուրախ եմ»,- նշեց երաժիշտը՝ խոստովանելով, որ ամեն համերգից հետո շտապում է տուն՝ ավարտելու իր աշխատանքները: «Ես կրքոտ երաժիշտ եմ, այդ պատճառով շատ եմ գրում, ու այն տպավորությունն է, թե ամեն տեղ կամ: Այն ամենը, ինչ կապ ունի երաժշտության հետ, ինձ հետ է առնչվում, ես դրա հետ կապ ունեմ»,- ասաց նա:
