Հրեա փաստաբանների միավորումը դիմել է ՄԱԿ-ի գլխավոր քարտուղար Պան Գի Մունին՝ պահանջելով դատապարտել Արաբ փաստաբանների միությանը (ALU),որը որոշել է հավերժացնել պաղեստինցի մահապարտ-ահաբեկչուհի Հանադի Ջանադատի հիշատակը:
Աղջիկն իրեն պայթեցրել էր իսրայելական Հայֆա քաղաքի «Մաքսիմ» ռեստորանում՝2003 թվականի հոկտեմբերի 4-ին: Ահաբեկչության հետևանքով զոհվել էր 21 մարդ, ավելի քան 50-ը՝ ստացել տարբեր աստիճանի մարմնական վնասվածքներ:
Պաղեստինյան Ջենին քաղաքի բնակչուհին, որը ընդգրկված էր «Իսլամական ջիհադ» խմբավորման մեջ, ստացել էր իրավաբանական կրթություն, այդ իսկ պատճառով Կահիրեում տեղակայված Արաբ փաստաբանների միությունը որոշել է հետմահու պարգևատրել նրան հատուկ մրցանակով: Անցած շաբաթ մրցանակը հանձնվել է Ջանադատի հարազատներին: ALU-ում պաղեստինյան կոմիտեի ներկայացուցիչ Այման Աբու Այշան հայտարարել էր, որ փաստաբանները հպարտանում են Ջանադատի արարքով՝ ի պաշտպանություն պաղեստինցիների և բոլոր արաբների:
Հրեա փաստաբանները նամակ են ուղարկել Պան Գի Մունին և պահանջել հեռացնել նրան կազմակերպության՝տնտեսական հարցերով խորհրդատուների ցուցակից:
