Asbarez.com-ի փոխանցմամբ՝ ամերիկացի հայամետ կոնգրեսական Ադամ Շիֆն իր հոդվածում գրել է, որ եթե ԱՄՆ-ը և ԵԱՀԿ Մինսկի խմբում նրա գործընկերները համաձայնեցված ջանքեր չգործադրեն Լեռնային Ղարաբաղի կարգավիճակի հստակեցման ուղղությամբ, որը կարտացոլեր Ղարաբաղի ժողովրդի կամքը, ապա ռազմական գործողությունների վերսկսումն ու սարսափելի զոհերի գրանցումը կդառնան ավելի իրատեսական:
Շիֆֆը կարծում է, որ տվյալ հարցի լուծումը բխում է բոլորի շահերից, և որ դա պետք է լինի 2013 թ. դիվանագիտական առաջնահերթությունը: Կոնգրեսականի պնդմամբ՝ պայքարի ու տնտեսական մեկուսացման տարիներն իրենց բացասական կնիքն են թողել Ղարաբաղի զարգացման վրա.
«ԱՄՆ հայ համայնքի աջակցությամբ ես պնդեցի, որ USAID-ն Արցախին հատկացնի ավելի շատ օգնություն: Թեև ես հասա նրան, որ հաջորդ տարվա բյուջեի նախագծում օգնության չափն աճեց ավելի քան կրկնակի անգամ (մինչև 5 միլիոն դոլար), սակայն պետք է ավելի մեծ գումար: Ուժեղ և անկախ Ղարաբաղի ստեղծումը միայն գործի կեսն է: Ադրբեջանին պետք է հիշեցնել, որ իր գործողությունների գինը բարձր է:
Ադրբեջանը կարևորում է անվտանգության ոլորտում Վաշինգտոնից ստացվող օգնությունը ոչ թե նրա համար, որ նա փողի կարիք ունի, այլ նրա համար, որ դա նշանակում է երկկողմ հարաբերություններում որոշակի մերձեցում: Դադարեցնելով Ադրբեջանին ռազմական օգնության տրամադրումը՝ ԱՄՆ-ն ի ցույց կդնի իր հակակրանքը «Սաֆարովի գործի» վերաբերյալ և միևնույն ժամանակ Ալիևին կհիշեցնի, որ ինքը չի հանդուրժի Հայաստանի ու Արցախի հանդեպ ագրեսիայի որևէ ակտ:
Ղարաբաղի բնակչությունը հիմնականում կազմում են հայերը, քրիստոնյաները և չպետք է թույլ տալ, որ նրանք հայտնվեն Ալիևի ձեռքում: Գովաբանելով մարդասպանին՝ Ալիևն ու նրա երկիրն աշխարհին ցուցադրեցին իրենց բնական էությունը և առավել համոզիչ դարձրին Ղարաբաղի անկախության լիովին ճանաչման գործընթացի արագացման համար բերվող փաստարկները»:
