Դեռևս 2009 թվականից նկարագրվող և որպես «գիշատիչ Իքս» հայտնի հսկա ծովային սողունին վերջապես պաշտոնական անվանում են տվել՝ Pliosaurus funkei: Բացի այդ, ծովային հրեշին գիտնականները դասակարգել են պլիոզավրերի նոր տարատեսակի, իսկ նրա չափսերը նվազեցվել են: Այս մասին հայտնում է LiveScience կայքը:
Համաշխարհային ճանաչում ձեռք բերած պլիոզավրի մնացորդները առաջին անգամ գիտնականները հայտնաբերել են 2006 թվականին, նորվեգական Շպիցբերգեն արշիպելագի կղզիներում: Դրանք փոքր-ինչ տարբերվել են նախկինում Անգլիայի և Ֆրանսիայի տարածքում հայտնաբերված պլիոզավրերի մնացորդներից:
Մի քանի տարի տևած ծնոտի, ողնաշարի և հետին վերջույթների հետազոտությունների արդյունքում պարզվել է, որ այն նոր տարատեսակ է: Անունը տրվել է ի պատիվ ոչ պրոֆեսիոնալ հետազոտողներ Բյորնի և Մայ Լիս Ֆունկեի, որոնք առաջինն են հայտնաբերել կարծրացած բրածոն:
Նախկինում կարծում էին, որ գիշատչի երկարությունը հասնում է 15 մետրի, սակայն վերջին հետազոտություններով երկարությունը նվազեցվել է մինչև 12 մետրի: Այնուհանդերձ, պլիոզավրի չափսերը գերազանցում են ներկայում գոյություն ունեցող ամենամեծ ծովային գիշատչի՝ մարդասպան կետի չափսերին, որի երկարությունը 9 մետր է:
