Новости-Грузия-ի փոխանցմամբ՝ Վրաստանի Բաթում քաղաքում բացվել է վրացական խաղողի օղու՝ չաչայի շատրվանը, որտեղից ջրի փոխարեն հոսելու է չաչա: Այսուհետ չաչա կարող են ըմպել բոլոր ցանկացողները՝ և՛ քաղաքաբնակները, և՛ Բաթումի հյուրերը:
Այդ անսովոր շատրվանի բացմանը ներկա են եղել Բաթումի քաղաքապետ Ջեմալ Անանիձեն և Աջարիայի կառավարության նախագահ Լևան Վարշալոմիձեն: Չաչայի շատրվանի բացման մասնակիցներին չաչա է հրամցվել հատուկ սարքավորման միջոցով: Նշվում է, որ շատրվանը ծառայելու է Բաթումում զբոսաշրջության զարգացմանը:
Ավելի վաղ նշվում էր, թե ալկոհոլը շատրվանից հորդելու է շաբաթական մեկ անգամ՝ 15 րոպեով: Շատրվանի բարձրությունը կազմում է 25 մետր, կառուցումը ֆինանսավորել է Բաթումի քաղաքապետարանը՝ տրամադրելով 810,000 լարի (488,000 դոլար):