Новости-Грузия-ի փոխանցմամբ՝ Հարավային Կովկասում և Կենտրոնական Ասիայում ՆԱՏՕ-ի հատուկ ներկայացուցիչ Ջեյմս Ափաթուրայն այս գիշեր ժամանել է Վրաստան: Թբիլիսիի օդանավակայանում լրագրողների հետ ունեցած զրույցում Ափաթուրայը հայտարարել է, որ ՆԱՏՕ-ն շարունակելու է համագործակցել Վրաստանի նոր իշխանությունների հետ.
«ՆԱՏՕ-ն նախկինի նման հավատարիմ է Բուխարեստի գագաթնաժողովի այն որոշմանը, որ Վրաստանը դառնալու է դաշինքի անդամ: Մենք նաև շարունակելու ենք աջակցել Վրաստանի տարածքային ամբողջականությանը: Սա իմ ներկայիս այցի հիմնական ուղերձն է:
Այժմ ձեր երկրի համար պատմական պահ է: Վրաստանում ընթանում է ժողովրդավարական ճանապարհով իշխանության հանձնման կարևոր գործընթաց: Վրաստանը ցույց տվեց երիտասարդ ժողովրդավարության օրինակ: Անցկացված ընտրությունները քննություն էին միջազգային հանրության աչքում, և Վրաստանը հանձնել է այդ քննությունը:
Ժողովուրդը հնարավորություն է ունեցել կատարելու իր ընտրությունը: Դա օրինակելի է տարածաշրջանի համար, ինչպես նաև դրա սահմաններից դուրս: Հին կառավարությունը հրաժարական է տվել և օրենքի ու ինքնահարգանքի շրջանակներում դարձել է ընդդիմություն: Դա այդպես էլ պետք է լիներ»:
Ափաթուրայը հավելել է, որ իր վրացական այցի շրջանակներում հանդիպումներ է ունենալու նախագահ Միխեիլ Սաակաշվիլիի վարչակազմի, խորհրդարանական ընտրություններում հաղթած «Վրացական երազանք» դաշինքի առաջնորդ, Վրաստանի վարչապետի թեկնածու Բիձինա Իվանիշվիլիի, ապագա կառավարության այլ ներկայացուցիչների հետ:
