«Հայկական ժամանակ»-ը գրում է, որ այս տարվա ապրիլի 2-ին «Գնումների աջակցման կենտրոն»-ի և «Ալեքսերվ» ՍՊԸ-ի միջև կնքվեց շրջանակային պայմանագիր, որի համաձայն` հաշվիչ դրամարկղային մեքենաների համար անհրաժեշտ կտրոնների թուղթը մատակարարում է հենց «Ալեքսերվ»-ը: «Է հա, ի՞նչ անենք»,- կասի ընթերցողը: Ոչինչ, աոաջին հայացքից՝ ոչինչ, քանի դեռ չենք կարդացել այդ շրջանակային պայմանագրի ամենավերջին հատվածը, որտեղ նշվում են պայմանագրի կողմերի տվյալները: Եվ ահա նայում ենք, թե ինչ հասցեով է գրանցված «Ալեքսերվը»: Գրանցված է Երևանի Տերյան փողոցի 19 շենքի 4-րդ բնակարանում: Տերյանի 19 շենքը ժամանակին հայտնվեց հայ հանրության ուշադրության կենտրոնում: Հենց այդ շենքի մուտքերից մեկում էին 2009 թվականի մայիսին մահափորձ կատարել ՀՀ պետեկամուտների կոմիտեի նախագահ Գագիկ Խաչատրյանի դեմ. տեղադրել էին 400 գրամ տրոտիլ տեսակի պայթուցիկ` հեռակառավարվող պայթուցիչով, սակայն, բարեբախտաբար, ռումբը չէր պայթել: Հիշեցի՞ք այդ դեպքը: Այսինքն, Գագիկ Խաչատրյանն ապրում էր այդ շենքում: Չէր նշվում, թե կոնկրետ որ բնակարանում:
Երեկ «ՀԺ»-ն պարզեց, որ Խաչատրյանը ապրել է ոչ թե 4-րդ բնակարանում, այլ հարևան մուտքում, և ոչ մի կապ «Ալեքսերվի» և Գագիկ Խաչատրյանի միջև, կարծես, չկա: Բայց դա այդպես չէ: Խնդիրն այն է, որ նույն այդ Տերյան 19, բնակարան 4-ում է գրանցված նաև հայտնի «Յուքոմ» ընկերությունը, որի կապը Գագիկ Խաչատրյանի հետ, թերևս, ոչ մեկի մոտ կասկած չի առաջացնում: Այլ կերպ ասած, «Ալեքսերվ» ՍՊԸ-ն նույնքան է կապված Գագիկ Խաչատրյանի հետ, որքան «Յուքոմը», այսինքն նույնպես դե ֆակտո պատկանում է ՀՀ պետեկամուտների կոմիտեի նախագահին:
Միայն հասցեն չէ, որ ՀԴՄ կտրոնների թուղթ մատակարարող ընկերությունը կապում է Գագիկ Խաչատրյանի հետ: Այդ ամուր կապի մասին հուշումն առկա է մեր հանրապետության բոլոր հարկային տեսչություններում: Այդ տեսչություններում չես տարբերի «Ալեքսերվ»-ի աշխատակցին հարկայինի աշխատակցից: Նրանք նստում են այն աշխատասենյակներում, որտեղ աշխատում են հարկայինի աշխատակիցները, ունեն իրենց գրասեղանը, «պերերիվ» են անում հարկայինի աշխատակիցների հետ նույն սենյակներում և այլն, և այսպես շարունակ: Մի խոսքով, «Ալեքսերվ» ՍՊԸ-ն դարձել է ՀՀ պետեկամուտների կոմիտեի ստորաբաժանումը: Եվ ինչո՞ւ ոչ. թե´ պետեկամուտների կոմիտեն, թե «Ալեքսերվը» նույն մարդու սեփական կանտորաներն են: