Օրերս մի խումբ բնապահպան ակտիվիստներ և Տավուշի մարզի Գետահովիտ գյուղից Երևան հասած բնակիչներ բողոքի ակցիա էին անում բնապահպանության նախարարության դիմաց: Բողոքի առարկան գյուղի Սառնաղբյուր գետի վրա կառուցվող ՀԷԿ-ն էր: Ակտիվիստներն ու գյուղի բնակիչները պնդում էին, որ շինարարության պատճառով գյուղը ջրազրկվել է, տարածքն ավերվել, և եթե շինարարությունը շարունակվի, վիճակն ավելի աղետալի կդառնա:
Բնապահպանության փոխնախարար Խաչիկ Հակոբյանից երեկ «Հրապարակ»-ը հետաքրքրվեց, թե ինչ ընթացք են տվել բնապահպանների բարձրացրած խնդրին: Պարզվում է` նախարարությունը համայնքի բնակիչներին և ակտիվիստներին հրավիրել է նախարարի մոտ` քննարկման, և հենց այդ քննարկման արդյունքում էլ աշխատանքային խումբ է ձևավորվել, որը կզբաղվի ՀԷԿ-ի կառուցման նպատակահարմարությունը որոշելու հարցով: «Քննարկմանը հրավիրել էինք նաև գյուղապետերին, փորձաքննության մասնագետների: Քննարկման արդյունքում որոշում կայացվեց, որ նախարարը կձևավորի աշխատանքային խումբ, որում կլինեն և´ համայնքի, և´ մարզպետարանի ներկայացուցիչներ, և´ համապատասխան մասնագետներ ու ՀԿ ներկայացուցիչներ»,- ասաց փոխնախարարը: Նրա հավաստմամբ, աշխատանքային խումբը երեկ արդեն, նախարարի հրամանի համաձայն, սկսել է իր աշխատանքները:
«Առաջին հանդիպումը տեղի ունեցավ նախարարի աշխատասենյակում, այնուհետև աշխատանքային խումբն աշխատակարգ մշակեց և, հրամանին համաձայն, տասնօրյա ժամկետում ուսումնասիրություններ կիրականացնի, և առաջարկություններ կներկայացվեն, որի հիման վրա արդեն մեր հետագա քայլերը կկառուցվեն»,- ավելացրեց Խաչիկ Հակոբյանը: Այսինքն հնարավո՞ր է, որ ուսումնասիրությունների արդյունքում դադարեցվեն աշխատանքները` հետաքրքրվեց թերթը: «Ուսումնասիրության արդյունքում ինչ որ կբացահայտվի, ինչ որ կպարզաբանվի, դրան համապատասխանաբար ընթացք կտրվի: Եթե անհրաժեշտություն կլինի` այո իհարկե»,- եղավ փոխնախարարի արձագանքը: Նա նաև վստահեցրեց, որ նախարարի հրամանով տեղում ՀԷԿ-ի շինարարական աշխատանքները դադարեցվել են, մինչև պաշտոնապես կհրապարակվի եզրակացությունը:
