Հոկտեմբերի 10-12-ը տեղի է ունեցել Հռոմի Արխիվային և գրքային ժառանգության վերականգնման ու պահպանման կենտրոնական ինստիտուտի տնօրեն Մարիա Քրիստինա Միզիտիի գլխավորած պատվիրակության այցը Երևան: Այցը նախաձեռնել և կազմակերպել էր Իտալիայում ՀՀ դեսպանությունը:
Այցի շրջանակներում քննարկվել են Հռոմի Արխիվային և գրքային ժառանգության վերականգնման ու պահպանման կենտրոնական ինստիտուտի և Մատենադարանի միջև հնարավոր համատեղ ծրագրերի իրագործումը, ստորագրվել է երկու հաստատությունների միջև համագործակցության մասին արձանագրություն:
ՀՀ ԱԳՆ մամլո գրասենյակից «Առաջին լրատվական»-ին հայտնում են, որ արձանագրության ստորագրման արարողությանը ներկա է եղել նաև Իտալիայում ՀՀ դեսպան Ռուբեն Կարապետյանը: Ստորագրված արձանագրությունը նախատեսել է համագործակցություն ձեռագրերի պահպանման և վերականգնման բնագավառում, մասնագետների փոխայցելություններ, Արխիվային և գրքային ժառանգության վերականգնման ու պահպանման կենտրոնական ինստիտուտի կողմից կազմակերպվող հնգամյա դիպլոմային դասընթացին Հայաստանից ուսանողի ներառում:
Հայաստան ժամանած պատվիրակությունը մասնակցել է նաև Մատենադարանում անցկացված «Հիշողության կերպարանքները. ձեռագիր և տպագիր ժառանգության պահպանումն ու վերականգնումը. ձեռագիր ֆոնդեր» 2-րդ միջազգային սեմինարին` ներկայացնելով ելույթներ Արխիվային և գրքային ժառանգության վերականգնման ու պահպանման կենտրոնական ինստիտուտի կողմից ծավալվող գործունեության և այդ հաստատության գիտահետազոտական հնարավորությունների մասին:
