Երևանի պետական համալսարանի ռեկտոր Արամ Սիմոնյանն արժանացել է Սանկտ Պետերբուրգի պետական համալսարանի պատվավոր դոկտորի կոչմանը:
ԵՊՀ մամլո ծառայությունից հայտնում են, որ Արամ Սիմոնյանին պատվավոր դոկտորի կոչման վկայագիրը հանձնել է ուսումնական և գիտական աշխատանքների գծով առաջին պրոռեկտոր Իգոր Գորլինսկին: ԵՊՀ ռեկտոր Արամ Սիմոնյանը, հոկտեմբերի 9-13-ին պաշտոնական այցով գտնվելով Սանկտ Պետերբուրգում, հանդես է եկել հայ-ռուսական փոխհարաբերություններին, դարավոր կապերին և բարեկամությանն անդրադարձող զեկույցով:
Արարողության ավարտից հետո Արամ Սիմոնյանը և Իգոր Գորլինսկին կնքել են համագործակցության շրջանակային պայմանագիր Սանկտ Պետերբուրգի և Երևանի պետական համալսարանների միջև: Պայմանագրում համագործակցության բազմաթիվ կետեր են ներառված, մասնավորապես, ուսանողների և դասախոսների փոխանակման ծրագրերի շարունակականությանը, ինչպես նաև քիմիայի, տնտեսագիտության, միջազգային հարաբերությունների, մաթեմատիկական մոդելավորման, կիրառական մաթեմատիկայի, լեզվի և գրականության, պատմության և ժուռնալիստիկայի բնագավառներում համագործակցությունը ամրապնդելուն առնչվող հարցեր:
Սույն պայմանագիրը 2010 թ-ին ՌԴ նախկին նախագահ Դմիտրի Մեդվեդևի և ՀՀ նախագահ Սերժ Սարգսյանի ներկայությամբ երկու համալսարանների ռեկտորների կնքած պայմանագրի շարունակությունն է: