Երգիչ, երգահան Վահան Արծրունին, անդրադառնալով երեկ Հանրապետության հրապարակում Երևանի տոնին նվիրված համերգին ռուսական «պոպսայի» ներկայացուցիչ Վերա Բրեժնևայի և «Սերեբրո» խմբի ներկայությանը, նշեց, որ ինչպես տեղեկացել է ինտերնետից, այդ «պոպսա» աղջիկներին պատիվ էին տվել մեր քաղաքապետարանին, դա Մոսկվայի քաղաքապետի, այսպես կոչված, շաբաշն էր մերոնց, որը շատ լավ ընդունվեց կառավարական պետական ատյանների կողմից։ «Նրանց դուրը եկավ, ինչի մասին վկայում են նրանց գոհ դեմքերը, իսկ ի՞նչ կապ ունեն նրանք մեր ժողովրդի հետ, Երևանի 2794 ամյակի հետ՝ ես չգիտեմ, թող այդ մասին հանրությունը մտածի»,- ասաց Վահան Արծրունին:
Նրա խոսքերով՝ նրանց են ուղարկել, քանի որ գիտեն հայերի ճաշակը, մակարդակը, դրա համար ուղարկում են ոչ թե Մոսկվայի սիմֆոնիկ նվագախումբը, այլ այն, ինչ իշխանություններին պետք է դուր գար:
«Դուք այս քսան տարիներին իշխանությունների ճաշակի մասին այլ եզրակացություն կարո՞ղ եք անել, իհարկե՝ սա է իրենց ճաշակը, և իհարկե՝ իրենք սիրով ընդունում են, ընկալում և մարսում, որովհետև սա լրիվ համապատասխանում է իրենց էսթետիկական և հոգեբանափիլիսոփայական դրվածքներին»- ասաց Վահան Արծրունին:
Մեր այն հարցին, թե հրավիրե՞լ են արդյոք Վահան Արծրունուն մասնակցելու համերգին, նա պատասխանեց. «Ես գնամ այնտեղ ի՞նչ անեմ, իրենք շատ լավ գիտեն՝ ես ինչ կարծիք ունեմ և ինչ կարող եմ ասել, դրա համար հրավիրում են նրանց, ում դուրը կգա, այնպես որ դուք իրենց ասած «կռուգի մասշտաբները» կարող եք որոշել: Ում հրավիրում են, իրենց թայֆից են, ուրեմն իրենց դուրն էլ է գալիս, իսկ այն, ինչ ժողովրդի ճաշակին է վերաբերում, կոպիտ բան պետք է ասեմ, որովհետև վերջիվերջո դա ժողովրդի դուրն էլ է գալիս, իսկ ում դուրը չի գալիս, չի մասնակցում, չի նայում, կամ էլ երկրից վերջիվերջո հեռանում է»,- ասաց Վ. Արծրունին, ապա հավելեց. «Մարդիկ հո ապուշ չեն թողնեն իրենց ամեն ինչը՝ հեռանան։ «Համերկրացիներ» ծրագիրը խրախուսվում է, սա անժամկետ ծրագիր է։ Ամբողջ գերդաստանով կարող եք դուրս գալ և ստանալ ամեն ինչ, ինչին ձգտում եք՝ Վերա Բրեժնևայից սկսած՝ վերջացրած մեր ռուս «եղբոր» համապատասխան վերաբերմունքով»։
