Հայաստանի ազգային հավաքականի ֆուտբոլիստ Հենրիխ Մխիթարյանը Դոնեցկի «Շախտյոր»-ի պաշտոնական կայքին տված հարցազրույցում խոսել է «Էրեբունի-Երևան»-ի տոնակատարության, Հայաստա – Իտալիա հանդիպման և մի շարք այլ հարցերի շուրջ:
«Ամեն ինչ հիանալի էր կազմակերպված և անցավ շատ բարձր մակարդակով: Հաճելի էր, որ այդքան մարդ էր հավաքվել տոնին: Հիանալի մթնոլորտ էր ու մեծ տոն»,- նշեց Մխիթարյանը:
-Մենա՞կ էիր գնացել միջոցառմանը:
-Այո: Այնուհետև ինձ միացավ մայրս:
-Հենրի՛խ, ես գիտեմ, որ Երևանի պատվավոր քաղաքացու կոչում են ստացել նաև շախմատիստ Ռաֆայել Վահանյանն ու Ստանիսլավսկու անվան թատրոնի գեղարվեսական ղեկավար Ալեքսանդր Գրիգորյանը: Շփվե՞լ ես նրանց հետ:
-Ճիշտ եք: Հաճույքով շփվել եմ նրանց հետ: Ուրախացա, քանի որ նրանք տեղեկացրին, որ հետևում են մեր հավաքականի հանդիպումներին: Քննարկեցինք Իտալիայի հավաքականի հետ խաղը: Մեծ պատիվ է 23 տարեկանում ստանալ Երևանի պատվավոր քաղաքացու կոչումը:
– Պարգևատրման արարողությունից հետո, հավանաբար, մարդիկ չէին թողնում հեռանալ…
-Մեծ թվով մարդիկ մոտցան, բայց պետք է նաև տուն հասնեի (ժպտում է):
-Չենք կարող չխոսել Իտալիայի հավաքականի հետ հանդիպման մասին: Վարդան Մինասյանն ասաց, որ դա Հայաստանի հավաքականի լավագույն հանդիպումներից էր: Ի՞նչ կարծիքի ես այդ խաղի մասին:
-Գիտակցում էինք, որ մրցակիցն Իտալիայի հավաքականն էր: Շատ դժվար խաղ էր: Ցանկանում էինք դրական արդյունքի հասնել, սակայն չստացվեց: Գոլային բազմաթիվ պահեր ստեղծեցինք, բայց իրացնել չստացվեց:
-Դու, ամեն դեպքում, գոլ խփեցիր: Երբ փոխանցում ստացար, անմիջապե՞ս որոշեցիր, որ պետք է դրվագի ելքն ինքնուրույն վճռես:
-Այո, քանի որ այլընտրանք չունեի: Բացի այդ, հրահանգ էինք ստացել՝ գնդակը ստանալուն պես նետվել հարձակման:
-Մինչև գարուն հրաժեշտ տվեցիր խաղընկերներիդ: Հավատու՞մ եք, որ պայքարը դեռ առջևում է:
-Իհարկե: Մենք միշտ հնարավորություն ունենք: Մենք չեն հանձնվելու և շարժվելու ենք առաջ:
