Վերջին շրջանում կարծես ավելի մեծ է անհանգստությունը Ռուսաստանի կողմից մեր երկրում իրականացվող «Համերկրացիներ» ծրագրի նկատմամբ, ինչը ժողովրդագիր Ռուբեն Եգանյանի կարծիքով` մի կաթիլ է այս համատարած արտագաղթի պայմաններում: Մեզանում ծրագրի նկատմամբ մտահոգությունը ժողովրդագիրը բացատրում է նրանով, որ Հայաստանից արտագաղթողների 80 տոկոսը մեկնում է հենց Ռուսաստան ու գտնվում է այդ երկրում:
«Այդ ծրագիրը մի կաթիլ է ծովում, թեև չկան պաշտոնական վիճակագրական տվյալներ»,- նկատեց նա՝ ներկայացնելով Հայաստանից արտագաղթածների մի քանի տվյալներ:
Այսպես. 2007թ. տվյալներով` մեր բացասական միգրացիոն սալդոն կազմել է 25-30 հազար մարդ, 2008թ.՝ 22 հազար, 2009-ին՝ հանրապետությունից գնացել ու չի վերադարձել 25 հազար մարդ, իսկ 2010-ին՝ 30 հազար:
«1992-ին արտագաղթողների բացասական սալդոն կազմել է 240 հազար, 1993-ին՝ 150 հազարից ավելի: 1995թ. հետազոտությունների արդյունքով՝ 90 տոկոսը մեկնել է ժամանակավոր: Իրադարձությունները զարգացան այնպես, որ ժամանակավորը դարձավ մշտական՝ պայմանավորված սոցիալ-տնտեսական պայմաններով»,- ասաց նա:
Ժողովրդագիրը ուշադրություն դարձրեց այն փաստի վրա, որ այս թվերը աճման միտում ունեն: Նրա խոսքով` ցավոք, այս տարվա տվյալներով, ամենայն հավանականությամբ, այդ թիվը կգերազանցի 30 հազարը:
«Այսօր խամրում է հույսը, հավատը ապագայի հանդեպ»,- ցավով նշեց նա՝ նկատելով, որ մենք կորցրինք 1998-1999թթ. զարթոնքի ալիքը, որը պետք էր օգտագործել:
Ինչ վերաբերում է «Համերկրացիներ» ծրագրին, ապա ըստ նրա, այդ ծրագիրը, որը գործում է նախկին խորհրդային երկրներում, «տապալվել է», քանի որ դրանով Ռուսաստան է մեկնել միայն 14 հազար մարդ:
Գեղանկարիչ Հաղթանակ Շահումյանն էլ իր հերթին մտահոգություն հայտնեց` ասելով, որ, ցավոք, եթե սկզբում մարդիկ երկրից հեռանում էին սոցիալ-տնտեսական վատ պայմանների պատճառով, ապա այժմ հեռանում են նաև ապահովված մարդիկ` երկրից դուրս բերելով իրենց կապիտալը:
«Մեկնողների մոտ են կուտակված մեր ֆինանսական միջոցները, և մենք իրավունք չունենք ասելու՝ մի գնացեք: Մեզ համար դա ցավալի է, քանի որ հեռանում են լավ մասնագետները: Հայաստանում այսօր երգելով ավելի շատ փող աշխատող կա, քան քարտաշ»,- նկատեց նա:
Ինչ վերաբերում է ՌԴ-ում Հայաստանի դեսպանի հայտարարությանը «Համերկրացիների» վերաբերյալ, ապա, նրա խոսքով, ոչ մի արտառոց բան չկա դրանում:
«Խնդիրն այն է, որ մենք պետք է գնացողների համար այնպիսի պայմաններ ստեղծենք, որ չգնան: Մարդիկ հեռանում են՝ մտահոգվելով իրենց երեխաների ապագայով»,- հավելեց Հ. Շահումյանը՝ ընդգծելով նոր աշխատատեղերի ստեղծման առաջնահերթությունը:
