Կոտդիվուարցի հարձակվող Դիդյե Դրոգբան, որն անգլիական «Չելսի»-ից տեղափոխվեց «Շանհայ Շենհուա», խոսել է այն լուրերի մասին, թե ինքը չինական ակումբ է տեղափոխվել առաջին հերթին ֆինանսական լավ պայմանների համար:
«Ես չեմ ժխտում, որ Չինաստանում մեծ գումարներ եմ վաստակում: Բայց այստեղ ամեն ինչ պարզ է. եթե դու լավ ես աշխատում, ապա ցանկանում ես, որ քո աշխատանքը գնահատվի հենց քո արժանիքներին համապատասխան: Երբ խոսքը վերաբերում է ֆուտբոլիստին, մարդիկ սիրում են նախանձով ու չարությամբ մեկնաբանել ամեն ինչ: Մարդիկ կարծում են, թե ֆուտբոլիստն ուղեղ չունի. նա փող է աշխատում գնդակ խաղալով: Սակայն ես կարծում եմ, որ կյանքում յուրաքանչյուրն ստանում է այն, ինչին արժանի է:
Չինաստան եմ տեղափոխվել, քանի որ ուզում էի ինձ տեսնել նոր աշխարհում, նոր մշակույթում: Այստեղ լրիվ այլ է. այստեղի կյանքը միանգամայն տարբերվում է լոնդոնյան կյանքից, որտեղ հիմա իմ երեխաներն են ապրում: Սակայն կարող եմ ասել, որ բավականություն եմ ստանում Չինաստանում»,- le10sport-ը մեջբերում է Դրոգբայի խոսքերը:
