2005 թվականին երկրագնդի շուրջ 1,6 մլրդ բնակիչներն անցանկալի, ավելորդ քաշ են ձեռք բերել, իսկ 600 միլիոնը տառապել է ճարպակալումից: Այսպիսին են Առողջապահության համաշխարհային կազմակերպության (ԱՀԿ) տվյալները: Իսկ 2015 թվականի վերաբերյալ կազմակերպության կանխատեսումները առավել վտանգավոր են. եթե այս աճը պահպանի տեմպերը, ապա 2015 թվականին ավելորդ քաշ կունենա 2.3 մլրդ մարդ, իսկ ճարպակալումից կտառապի 700 միլիոնը:
ԱՀԿ-ի տվյալներով, սա պայմանավորված է բարձրկալորիական ուտելիքի մասսայականությամբ և սրան զուգահեռ՝ մարդկության ֆիզիկական ակտիվության նվազմամբ: Կալիֆոռնիայի համալսարանի գիտնականների համոզմամբ, հենց այդ գիրացումներն ու ճարպակալումները կհանգեցնեն մի շարք հիվանդությունների, օրինակ` սիրտ-անոթային, կտրուկ աճին: Ճարպակալում ունեցող հիվանդների 90 տոկոսը, վաղ թե ուշ շաքարային դիաբետով հիվանդ են դառնում: Ի դեպ, նույն ԱՀԿ տվյալներով`աշխարհում յուրաքանչյուր 4-րդ մարդը հիվանդ է շաքարային դիաբետով: Սպասվում է, որ այս հիվանդությամբ աշխարհում մի քանի տարի հետո կտառապի յուրաքանչյուր երրորդը:
Ինչ վերաբերում է գիրացման բուն պատճառներին` ԱՀԿ մասնագետները համոզված են, որ խնդիրը ոչ թե օգտագործվող սննդի քանակն է, այլ թե օրական քանի անգամ, և ինչ սնունդ է օգտագործվում: Եվ այստեղ պետք է հատկապես ուշադրություն դարձնել սննդի ծագմանն ու բաղադրությանը, ինչը ամբողջ աշխարհում այսօր մեծագույն խնդրի է վերածվել: Ի դեպ, մասնագետները խորհուրդ են տալիս սննդացանկում անպայման ներառել կաթնամթերքը, որը պարունակում է մարդու օրգանիզմի համար չափազանց կարևոր տարր՝ կալցիում, և սահմանափակել կանցերոգենների մեծ քանակություն պարունակող սնունդի ընդունումը: