«Ությակի» երկրները (Մեծ Բրիտանիա, Իտալիա, Կանադա, Ռուսաստան, ԱՄՆ, Ֆրանսիա, Գերմանիա, Ճապոնիա) 160 մլն դոլար կտրամադրեն Մերձավոր Արևելքի և Հյուսիսային Աֆրիկայի երկրներում տնտեսության վերականգնման և ժողովրդավարական բարեփոխումների համար: Այս մասին, ինչպես հաղորդում է ITAR-TASS-ը, հայտարարել է Ճապոնիայի ֆինանսների նախարար Կորիկի Ձյոձիման «Ությակի» ֆինանսների նախարարների և «Դովիլյան գործընկերության» հանդիպումից հետո:
Նրա խոսքերով՝ երեք տարվա ընթացքում Ճապոնիան 12 մլն դոլար կտրամադրի այն երկրներին, որոնք տուժել են ընդդիմության և կառավարության միջև տեղի ունեցած բախումների արդյունքում: ԱՄՆ-ը, իր հերթին, կհատկացնի 50 մլն դոլար, Մեծ Բրիտանիան և Սաուդյան Արաբիան՝ 25 մլն դոլար: «Դա պատմական նախագիծ է»,- ասել է Ձյոձիման երկու հանդիպումներից հետո տեղի ունեցած մամուլի ասուլիսում:
«Դովիլյան գործընկերություն» ծրագիրը գործարկվել է 2011 թ. մայիսին՝ համաշխարհային առաջատար տերությունների «Մեծ Ությակի» գագաթնաժողովին, որի նպատակն էր աջակցել Մերձավոր Արևելքում և Հյուսիսային Աֆրիկայում ժողովրդավարական ձգտումներին: Խոսքը վերաբերում էր այնպիսի երկրներին, ինչպիսիք են Եգիպտոսը, Թունիսը, Լիբիան: «Ությակի» երկրները և միջազգային վարկատու ֆինանսական ինստիտուտները համաձայնության էին եկել տարածաշրջանի երկրներին լայն աջակցություն ցուցաբերել քաղաքական և տնտեսական բարեփոխումների ճանապարհին: «Ությակի» երկրներից բացի, «Դովիլյան գործընկերության» մեջ են մտնում Սաուդյան Արաբիան, Թուրքիան և Քուվեյթը:
«Ությակի» ֆինանսների նախարարներերի և «Դովիլյան գործընկերության» ֆինանսների նախարարների հանդիպումը տեղի է ունեցել այսօր:
