Աֆղանստանում բրիտանացի արքայազն Հարրիի մարտական ուղղաթիռը ոչնչացրել է «Թալիբան» շարժման մի քանի ռազմական օբյեկտներ, ինչպես նաև մասնակցել վիրավոր բրիտանացի զինծառայողի փրկության օպերացիային: Այս մասին հայտնում է The Sun-ը:
Ինչպես նշվում է հրատարակության հոդվածում, վերջին չորս շաբաթներին Հարրին բազմիցս մարտական թռիչքներ է իրականացրել օդային տրանսպորտի ուղեկցման և թալիբների ցամաքային օբյեկտների ոչնչացման նպատակով: Առաքելություններից մեկի ժամանակ նա օդից աջակցություն է ցուցաբերել մեկ այլ ուղղաթիռի, որը վայրէջք էր կատարել` տարհանելու ծանր վիրավորված զինվորին:
«Արաքայազնը չի վախեցել ռիսկի ենթարկել իր կյանքը` մարտական առաջադրանքի կատարման համար»,- հայտնել է արքայազնի շրջապատի մարդկանցից մեկը` նշելով, որ հիմա դժվար թե գտնվի մեկը, որը կասի, թե Հարրին Աֆղանստանում է գտնվում արտոնյալ կարգավիճակով: «Արքայազնը իրականում կանգնած է սարսափելի պատերազմի առաջին շարքերում»,- հայտնել է զրուցակիցը:
Որպես թագավորական ռազմաօդային ուժերի զինծառայող՝ Հարրին Աֆղանստան է ժամանել սեպտեմբերին և այնտեղ կգտնվի մինչև հունվար: Ծառայակիցները նրան կապիտան Ուելս են անվանում: Նա «Ապաչ» ուղղաթիռի անձնակազմում նշանակված է որպես երկրորդ օդաչու:
Աֆանստանում բրիտանական զորակազմի շարքում այս գործուղումը երկրորդն է Հարրիի համար: Առաջին անգամ նա այնտեղ է եղել 2007-ի վերջին և 2008-ի սկզբին` 10 շաբաթով։
