Ռուսական Коммерсант թերթը նշում է, որ Միացյալ Նահանգների փոխնախագահ Ջո Բայդենից պատասխան են պահանջելու Հիլարի Քլինթոնի` Լեհաստանում հակահրթիռային պաշտպանության համակարգի տեղակայման հնարավորության վերաբերյալ հայտարարության կապակցությամբ:
Ինչպես թերթին հաղորդել են Ռուսաստանի արտաքին գործերի նախարարությունում, Քլինթոնի հայտարարությունը բավական մտահոգել է Մոսկվային. «Հակահրթիռային պաշտպանության համակարգերի մասին խոսակցությունները նոր չեն, մենք գիտենք դրա մասին և ակնկալում ենք համաձայնության գալ Եվրոպայում հակահրթիռային պաշտպանության համատեղ համակարգ ստեղծելու շրջանակում: Իսկ ահա ավիաբազա ստեղծելու մասին հայտարարությունը պահանջում է լրացուցիչ պարզաբանումներ»,- նշել է թերթի աղբյուրն ԱԳՆ-ում:
Նույն աղբյուրը նշել է, որ այդ հարցը բարձրացվելու է ԱՄՆ փոխնախագահի և Ռուսաստանի նախագահ Դմիտրի Մեդվեդևի հանդիպման ժամանակ, որը կայանալու է մարտի 9-ին:
Տեղեկացնենք, որ ԱՄՆ պետքարտուղար Հիլարի Քլինթոնի և Լեհաստանի արտաքին գործերի նախարար Ռադոսլավ Սիկորսկու հանդիպման ժամանակ Քլինթոնը հայտարարել է, որ ԱՄՆ-ն մտադրություն ունի Լեհաստանում տեղակայել ռազմաօդային բազա և ամերիկյան հակահրթիռային պաշտպանության համակարգի տարրեր, և որ դրանք ժամանակավոր չեն լինելու:
«Ինչպես հայտարարել են մեր նախագահները դեկտեմբերին, մենք պատրաստվում ենք Լեհաստանում տեղակայել ԱՄՆ ռազմաօդային ուժերի մշտական ռազմաբազա և կառուցել ՀՀՊ համակարգ, ինչպես նաև Լիսաբոնում կայացված համաձայնության հիման վրա մշակել տարածաշրջանում գործակցության արտակարգ ծրագիր»,- ասել է Քլինթոնը:
Interfax-ին տված հարցազրույցում, արձագանքելով Քլինթոնի խոսքերին, Ռուսաստանի Դաշնության ներկայացուցիչը ՆԱՏՕ-ում` Դմիտրի Ռագոզինը, ասել է, որ այդ հայտարարությունը մտահոգություն է առաջացրել ռուսական կողմի մոտ: «Կարծում եմ, որ այս հայտարարությունը կարժանանա ՌԴ ուշադրությանը»,- նշել է նա:
