Ազգային ժողովում հոկտեմբերի 5-ին տեղի է ունեցել Գերմանիայի Դաշնային Հանրապետության Բունդեսթագի պատգամավոր, գերմանա-հարավկովկասյան խորհրդարանական խմբի նախագահ Վոլֆգանգ Բյորնզենի հեղինակած «Փոքր թերություններով լավ օրինակներ» գրքի շնորհանդեսը: Այս մասին «Առաջին լրատվական»-ին հայտնում են ՀՀ ԱԺ հասարակայնության և տեղեկատվության միջոցների հետ կապերի վարչությունից:
Խորհրդարանական առօրյայի, պատգամավորների աշխատանքի մասին պատմող գիրքը հայերեն է թարգմանել «Կոնրադ Ադենաուեր» հիմնադրամի հայաստանյան մասնաճյուղը: Հրատարակությունը նախատեսված է որպես ավանդ խորհրդարանականներին աջակցության գործում, ինչպես նաեւ նպատակ ունի հասարակությանն իրազեկելու օրենսդիրի գործունեության մասին: Սակայն այդ ամենն ընթերցողին է մատուցվում գրավիչ եւ մատչելի ոճով գրված տեղեկատվությամբ:
«Փոքր թերություններով լավ օրինակներ» գրքի շնորհանդեսի հրավիրյալներին ողջույնի խոսք է հղել ԱԺ նախագահ Հովիկ Աբրահամյանը.
«Մեծարգո պարոն Բյորնզեն,
Հարգարժան պարոն դեսպան,
Տիկնայք եւ պարոնայք:
Ուրախ եմ ողջունել Ձեզ Հայաստանի Հանրապետության Ազգային ժողովում: Այսօր ներկա ենք գեղեցիկ մի արարողության, որը նվիրված է մեր գործընկեր, Գերմանիայի Բունդեսթագի երկարամյա եւ փորձառու պատգամավոր, Գերմանիա – Հարավային Կովկաս բարեկամության խմբի ղեկավար Վոլֆգանգ Բյորնզենի գրքի շնորհանդեսին:
Սա, ըստ էության, մի աշխատություն է, որը վերաբերում է ժողովրդի կողմից ընտրված իշխանության ներկայացուցչին, գրված է պաշտոնյայի կողմից, սակայն իր ոճով զերծ է պաշտոնականությունից: Գիրքը հանրամատչելի ոճով եւ երբեմն նաեւ հումորային երանգներով նկարագրում Է խորհրդարանական առօրյան. առօրյա, որը բնորոշ է գրեթե բոլոր երկրներին՝ իր նմանություններով եւ տարբերություններով: Այդ առօրյան ստեղծում են մարդիկ, տվյալ դեպքում՝ պատգամավորներ, ովքեր նման են իրենց պարտականություններով ու իրավունքներով եւ տարբեր են դրանք պետության, ընտրողի շահերին ծառայեցնելու եւ համադրելու անձնական ընկալումների առումով: Հասկանալի է, որ այս ամենը լավագույնս համադրելու ձգտումը պատգամավորից պահանջում է սկզբունքայնության դրսեւորում եւ սուբյեկտիվիզմի բացառում:
Պատգամավորի գործունեությունը ենթադրում է ամենօրյա քրտնաջան աշխատանք, որի ընթացքում ստեղծվում են տարբեր իրավիճակներ՝ ոչ միայն օրենսդրական բնույթի, այլ նաեւ զգացմունքային, երբեմն նաեւ հումորային, որոնք միշտ չէ, որ նկատելի են հասարակության համար:
Վառ օրինակ է պարոն Բյորնզենի նկարագրած պատգամավորը, որը չի խուսափում իր պատասխանատվությունից` իրագործելու ընտրողի հանդեպ իր պարտավորությունները եւ անտեսելով անձնական խնդիրները: Դա բնորոշ է ոչ միայն Բունդեսթագին, այլեւ տեսականորեն բոլոր խորհրդարաններին: Ցանկանալի է, որ այդպես լինի նաեւ գործնականում:
Ես բարձր եմ գնահատում «Կոնրադ Ադենաուեր» հիմնադրամի` պարոն Բյորնզենի աշխատությունը թարգմանելու եւ հայ հասարակությանը ներկայացնելու այս նախաձեռնությունը:
Շնորհավորում եմ բոլորիս այս օգտակար եւ արժեքավոր աշխատության հրատարակման եւ շնորհանդեսի առթիվ: Վստահ եմ, որ խորհրդարանական աշխատանքը յուրովի ներկայացնող այս գիրքը մեծ հետաքրքրություն կառաջացնի ոչ միայն օրենսդիր իշխանության ներկայացուցիչների, այլեւ ընդհանրապես հասարակության լայն շրջանակներում:
Շնորհակալություն ուշադրության համար»:
Հեղինակը՝ Վոլֆգանգ Բյորնզենը, ով քսանհինգ տարեկանից Բունդեսթագի խորհրդարանական է, ներկայացնելով գիրքը, այն բարձր գնահատեց հատկապես հայ-գերմանական միջխորհրդարանական կապերի ամրապնդման եւ խորացման տեսանկյունից՝ հույս հայտնելով, որ իր հեղինակած աշխատությունը կհետաքրքրի թե Ազգային ժողովի անդամներին եւ թե լայն հասարակայնությանը: Նա շնորհակալություն հայտնեց ԱԺ նախագահ Հովիկ Աբրահամյանին աջակցության եւ ջերմ հյուրընկալության համար: «Կարծում եմ՝ այս գիրքը պետք է ծառայի նաեւ այն գաղափարին, որ խորհրդարանական ժողովրդավարությունը խաղաղության հիմնաքարերից է»,- նշեց Վոլֆգանգ Բյորնզենը:
