«Ես հայհոյել չգիտեմ, բայց ոստիկաններին պետք էր պատասխան տալ: Ես այդ կերպ կարողացա: Նրանք հարձակվել էին Անահիտ Բախշյանի վրա, ում առողջական վիճակը կտրուկ վատացավ»,- այսօր Գյումրիի ժուռնալիստների «Ասպարեզ» ակումբում ասել է ԱԺ պատգամավոր Զարուհի Փոստանջյանը` անդրադառնալով տարբեր լրատվամիջոցներում հրապարակված իր ժեստերի մասին՝ ուղղված ոստիկաններին:
Վերջիններս, ըստ պատգամավորի, բիրտ ուժ էին գործադրում քաղաքացիների և անգամ անձեռնմխելի համարվող պատգամավորների նկատմամբ: Այդ թոհուբոհի ընթացքում ոստիկաններն անգամ հայհոյանք են հնչեցրել բողոքի ակցիայի մասնակիցների հասցեին: Հիշեցնենք, որ մարտի 3-ին ոստիկանները ուժի կիրառմամբ ցրել են կառավարության շենքի մոտ բացօթյա առևտրի իրավունքից զրկված քաղաքացիների բողոքի խաղաղ ցույցը:
Պատգամավորը անդրադարձավ ոստիկանության աշխատակիցների, իր որակմամբ, ոչ օրինական գործողություններին, պատմել նրանց կողմից ՀՀ քաղաքացիների սահմանադրական և մարդու իրավունքների ոտնահարման մասին:
«Ոստիկանության արարքները պարունակում են քրեական օրենսգրքով նախատեսված գործողություններ: Բողոքելը ՀՀ քաղաքացու իրավունքն է, իսկ ոստիկանը պետք է կարգին հետևի»,- ասաց տիկին Փոստանջյանը: Ոստիկանության տարածած պաշտոնական պարզաբանումներով, իրավապահները պաշտպանել են հասարակական կարգը:
Այնինչ, ըստ պատգամավորի, ոստիկանության աշխատակիցները, դուրս գալով իրենց լիազորություններից, սահմանափակել են քաղաքացիների՝ բողոքի ձայն բարձրացնելու իրավունքը` միաժամանակ խոչընդոտելով նրանց մոտենալ կառավարության շենքին, խախտելով ազատ տեղաշարժվելու իրավունքը:
Տիկին Փոստանջյանն անդրադարձավ նաև վրացական պետհամարանիշերով ավտոմեքենաների մաքսազերծման խնդրին: Ըստ նրա` հարցին իրականում չի տրվել այն լուծումը, որի ակնկալիքն ունեին վարորդները, պետությունը զիջել է ընդամենը ժամանակի հարցում:
ԱԺ պատգամավորը զգուշացրեց նաև, որ իր այցելությունները Գյումրի հաճախակի են դառնալու: Նպատակը մեկն է` պայքար գոյություն ունեցող անարդարությունների ու ապօրինությունների դեմ: