«Կոալիցիոն վերջին հուշագիրը քաղաքական դաշտը բետոնացնում է և ոչ միայն 2012 թ. պատկերն է փորձում ֆիքսել, այլև կանխորոշում է առաջիկա յոթ տարիների մեր քաղաքական կենսագրությունը, և բնական է, որ դա հակազդող բևեռացման պիտի տանի»,- լրագրողների հետ հանդիպման ժամանակ կարծիք հայտնեց ԱԺ ՀՅԴ խմբակցության պատգամավոր Լիլիթ Գալստյանը:
Նա նշեց, որ մտավախություն ունի, թե մենք պետք է ունենանք այն պատկերը, ինչը կար 2008 թ. նախագահական ընտրություններից առաջ. «Առանց այն էլ սոցիալ-տնտեսական կյանքում սարսափելի բևեռացում ունենք, դրան կգումարվի քաղաքական բևեռացումը, և ես, որպես ՀՀ քաղաքացի, սարսափում եմ այն հեռանկարից, որը մենք կունենանք, երբ այդ բևեռները բախվեն»:
Գալստյանի խոսքերով, այդ ամենի համար պատասխանատվություն են կրում իշխանությունները և քաղաքական մեծամասնությունը, որոնք փորձում են թաքնվել համաշխարհային տնտեսական ճգնաժամի վարագույրի ետևում, և բարեփոխումների կամ առաջընթացի վերաբերյալ հայտարարությունները ծիծաղելի են:
ՀՅԴ-ական պատգամավորի գնահատմամբ, այսօր ՀՀ կառավարությունը իր գործողություններով խթանում է սոցիալական բունտը:
ՀՀԿ-ական պատգամավոր Հովհաննես Սահակյանն էլ նկատեց, որ ընդդիմությունն իր հույսը դրել է միայն եգիպտական կամ թունիսյան սցենարների վրա:
Նա նաև ավելացրեց, որ կոալիցիոն հուշագիրը իրավական բնույթ չունի, և իր համար զարմանալի է, որ ընդդիմադիր դաշտը «իր քաղաքական ապագան կերտում է կոալիցիայի ապագայի հետ կապված»: Սահակյանը նաև նկատեց, թե ուրախ կլիներ, որ ընդդիմադիր դաշտն էլ բետոնանար՝ վերջացնեինք:
