Անգլիական «Լիվերպուլ»-ի կիսապաշտպան Սթիվեն Ջերարդը կարծում է, որ եթե «Չելսի»-ն ու «Մանչեսթեր Սիթի»-ն չունենային հարուստ սեփականատեր, ապա նրանց համար շատ բարդ կլիներ հաղթող ճանաչվել «Լիվերպուլ»-ի դեմ խաղերում:
Իր կարիերայի ընթացքում Ջերարդը բազմաթիվ տիտղոսներ է նվաճել, այդ թվում՝ Չեմպիոնների լիգայի հաղթողի կոչումը: Սակայն մի տիտղոս, որ մինչև հիմա Ջերարդին ոչ մի կերպ չի հաջողվում նվաճել, Անգլիայի Պրեմիեր լիգայի հաղթողի կոչումն է: Սթիվենը կարծում է, որ սրա պատճառը Անգլիայի Պրեմիեր լիգա բերված ահռելի քանակությամբ փողերն են:
«Լավ չէ, երբ խոսում ես ուրիշի փողերի մասին, բայց ես ուղղակի համոզված եմ, որ եթե Ռոման Աբրամովիչը չլիներ «Չելսի»-ում ու «Մանչեսթեր Սիթի»-ի այն տղան(շեյխ Մանսուր – խմբ.) չլիներ, ապա ես նվազագույնը երկու-երեք անգամ կնվաճեի Անգլիայի Պրեմիեր լիգայի հաղթողի կոչումը:
Մարդիկ, որոնք ահռելի գումարներ են ներդնում տարբեր ակումբներում, անուղղակիորեն կապ են ունենում նաև նրանց մրցակից թիմերի հետ: Սա եղավ նաև իմ դեպքում: Մեր թիմը ոչ մի կերպ չի կարող ֆինանսական առումով մրցել նրանց հետ»,- գրել է Սթիվենը իր՝ My Liverpool Story գրքում:
