Գնահատելով երեկ կառավարության առաջ տեղի ունեցած միջադեպը՝ ԱԺ պատգամավոր Վարդան Խաչատրյանը լրագրողների հետ հանդիպման ժամանակ ասաց, որ այս ամենն անցել է հնարավորի բոլոր սահմանները և վկայում է այն մասին, թե մենք ինչքան հեռու ենք քաղաքացիական հասարակությունից:
Խաչատրյանը նշեց, որ հարց է ծագում՝ ովքե՞ր են կանգնած այդ ամենի հետևում, և ո՞վ է ոստիկաններին հրաման տվել, քանզի ոստիկանությունը նման կամայականությունների չէր դիմի, եթե չլիներ հստակ պատվիրատու: «Մենք գործ ունենք ոստիկանական բացարձակ տեռորի հետ և այս դեպքի պատասխանատուները պետք է անպայման պատասխանատվության ենթարկվեն»,- ասաց Խաչատրյանը:
Վարդան Խաչատրյանի ընդդիմախոս, ԱԺ ՀՀԿ-ական պատգամավոր Գագիկ Մինասյանը էլ նշեց, թե իր տեղեկություններով, ցուցարարները անպատիվ խոսքեր են ասել կառավարության ներկայացուցչին, ոստիկանությունն էլ զսպվածության կոչ է արել, որից հետո էլ սկսվել է այն ամենը, ինչի վերաբերյալ տեսանյութերը մենք տեսնում ենք գրեթե բոլոր լրատվամիջոցներում: Մինասյանի խոսքերով, մեր ուժային կառույցները, ինչպես և ցուցարարները, պետք է իրենց գործունեությունը տեղավորեն օրենքի շրջանակներում. «Իսկապես ցավալի իրավիճակ է, և ես երկուստեք բարեկրթության և խոհեմության կոչ եմ անում»,- ասաց Գագիկ Մինասյանը:
