РИА Новости-ի փոխանցմամբ՝ YouTube վիդեո հոսթինգը Թուրքիայում աշխատելու է տեղի tr դոմեյնի գոտում՝ դրանով իսկ թուրքական իշխանություններին տրամադրելով մեծ վերահսկողություն կայքի բովանդակության նկատմամբ: 2008 թվականի մայիսին Թուրքիայում 30 ամսով արգելափակվեց YouTube-ը, ինչի պատճառը դրանում Թուրքիայի Հանրապետության հիմնադիր Մուսթաֆա Քեմալ Աթաթուրքին վիրավորող տեսանյութերի հայտնվելն էր:
Թուրքիայի տրանսպորտի և հաղորդակցության նախարար Բինալի Յըլդըրըմը հայտարարել է, թե իշխանությունները կարողացել են համոզել Google ընկերությանը, որին պատկանում է YouTube-ը, որ անհրաժեշտ է՝ որ այդ վիդեո հոսթինգն աշխատի թուրքական դոմեյնի գոտում.
«Դա կարևոր որոշում է: Երկար ժամանակ մենք Թուրքիայում աշխատող ինտերնետային ընկերություններին կոչ ենք արել պահպանել երկրի կանոնները: Վիդեո հոսթինգի թուրքական տարբերակը գտնվելու է www.youtube.com.tr հասցեում: Այժմ նա պարտավոր է իրագործել դատարանի որոշումը և հեռացնել անցանկալի հրապարակումները»:
YouTube-ի տարածած հաղորդագրության մեջ ասվում է, որ վիդեո հոսթինգը գործարկում է կայքի թուրքերեն տարբերակը՝ նախատեսված Թուրքիայի բնակչության համար: Նախորդ շաբաթ թուրքական դատարանն իշխանություններին արտոնել էր արգելափակել օնլայն մուտքը հակաիսլամական «Մուսուլմանների անմեղությունը» ֆիլմին:
Տվյալ արգելքը նախաձեռնած Բինալի Յըլդըրըմը հայտարարել է, որ նախկինում այդպիսի տեսանյութերի մուտքի արգելափակումը խնդրահարույց էր, քանի որ դրա համար պահանջվում էր կապ հաստատել արտերկրում գտնվող պորտալի սեփականատերերի հետ: Նա հավելել է, որ ներկայումս դրա կարիքը չկա, և դատարանի որոշումները կիրագործվեն անհապաղ:
