Վրաստանի նախագահ Միխեիլ Սաակաշվիլին մտադիր չէ ժամանակից շուտ հեռանալ պաշտոնից: Այս մասին է վկայում այն հայտարարությունը, որն այսօր արել է նրա ամենամոտ կողմնակիցներից մեկը` երկրի Անվտանգության խորհրդի քարտուղար Գիգա Բոկերիան, փոխանցում է ИТАР-ТАСС-ը:
«Ուզում եմ բոլորին, այդ թվում`«Վրացական երազանք» կոալիցիային ու Բիձինա Իվանիշվիլուն հիշեցնել, որ հերթական նախագահական ընտրությունները տեղի կունենան 2013 թվականին»,- ասել է նա: «Ռուսթավի-2» հեռուստաընկերության ուղիղ եթերում Բոկերիան հույս է հայտնել, որ «նախագահական ընտրությունները տեղի կունենան նույն ժողովրդավարական մթնոլորտում, որում տեղի են ունեցել հոկտեմբերի մեկի խորհրդարանական ընտրությունները»:
Ավելի վաղ «Վրացական երազանք»-ի ղեկավար Բիձինա Իվանիշվիլին հայտարարել էր, որ «հաջորդ միակ ճիշտ քայլը Սաակաշվիլու կողմից կլինի հրաժարական տալն ու արտահերթ նախագահական ընտրություններ նշանակելը»:
«Կարծում եմ` նա կկարողանա անել դա»,- ասել է Իվանիշվիլին: Նրա կարծիքով` «դա տրամաբանական քայլ կլինի Սաակաշվիլու այսօրվա հայտարարությունից հետո», որում նա փաստացի ճանաչել է իր կուսակցության պարտությունն ու «Վրացական երազանք» ընդդիմադիր կոալիցիայի հաղթանակն ընտրություններում:
Լրագրողի հարցին, թե «Վրացական երազանք»-ի` խորհրդարանում մեծամասնություն կազմելու դեպքում կուսակցությունը կնախաձեռնի՞ Սաակաշվիլու պաշտոնանկությունը, Իվանիշվիլին պատասխանել է. «Այսօր մենք այդպիսի ծրագիր չունենք, բայց եթե նախագահը հրաժարական չներկայացնի և արտահերթ ընտրություններ չնշանակի, մենք, իհարկե, որոշ քայլեր կձեռնարկենք, այդ թվում` չի բացառվում նաև պաշտոնանկությունը»:
Սաակաշվիլու նախագահական լիազորությունների ժամկետը լրանում է 2013-ի հոկտեմբերին:
