ԱՄՆ նախագահի թեկնածու Միթ Ռոմնին հերթական անգամ խիստ քննադատության է ենթարկել Բարաք Օբամայի ադմինիստրացիայի` Մերձավոր Արևելքում վարած արտաքին քաղաքականությունը:
Այսօր Wall Street Journal-ում հրապարակված հոդվածում Ռոմնին կոչ է արել տարածաշրջանի երկրների նկատմամաբ նոր ռազմավարություն ընդունել:
«Մերձավոր Արևելքում անհանգստացնող իրավիճակ է. Սիրիայում սպանվում են տասնյակ հազարավոր անմեղ մարդիկ, Եգիպտոսի նախագահ է դարձել «Մահմեդական եղբայրներ» կազմակերպության անդամը, ինչի արդյունքում Իսրայելի հետ խաղաղ պայմանագիրը հայտնվել է հարցականի տակ, մեր դեսպանը Լիբիայում ահաբեկչական հարձակման ընթացքում սպանվել է, տարածաշրջանում ԱՄՆ դեսպանատները ենթարկվել են հարձակումների, Իրանի իշխանությունները շարունակում են միջուկային զենք ստեղծել՝ միաժամանակ սպառնալով ոչնչացնել Իսրայելը»,- գրում է Ռոմնին:
Նրա կարծիքով՝ ԱՄՆ-ում մերձավոր արևելյան նոր քաղաքականության հիմքում պետք է ընկած լինի տարածաշրջանում կողմնակիցների, այդ թվում նաև Իսրայելի աջակցութունը, և առավել կոշտ վերաբերմունք Իրանի նկատմամբ:
«Երբ մենք հայտարարում ենք, որ անընդունելի ենք համարում Իրանում միջուկային զենքի ի հայտ գալը, ապա Իրանի իշխանությունները պետք է հաշվի նստեն դրա հետ»,- ասել է Ռոմնին:
