Ռուսաստանի Դաշնության նախագահ Դմիտրի Մեդվեդևը հայտարարել է, որ դեմ է «ռազմա-բյուրոկրատական ուղղահայաց» կառավարմանը: Ըստ նախագահի` Ալեքսանդր 2-րդ կայսրի ամենամեծ վաստակն այն է, որ կարողացավ հրաժարվել ավանդական բարքերից և չվախեցավ բարեփոխումներ իրականացնել. հաղորդում է ITAR-TASS գործակալությունը:
Այս մասին Մեդվեդևը խոսել է «Մեծ բարեփոխումները և Ռուսաստանի արդիականացումը» կոնֆերանսի ժամանակ, որն այսօր կայացել է Մոսկվայում: Մեդվեդևը նշել է, որ Ալեքսանդր 2-րդը ժառանգություն է ստացել ճորտատիրությունը և պետության ռազմա-բյուրոկրատական ուղղահայաց կառավարումը:
«Կայսրության արտաքուստ հզորության հետևում,- իսկ աչքին թոզ փչել մենք միշտ կարողացել ենք,- նա նկատեց թուլություն և այդ ինստիտուտների անհեռանկարայնություն»,- նշել է նա: Մեդվեդևը ասել է, թե հիմա Ռուսաստանում շարունակվում է այդ քաղաքականությունը, որի հիմքերը դրվել են մեկ ու կես տարի առաջ:
Նա նշել է, որ «նորմալ, մարդասիրական կարգը», որը մշակվել էր Ալեքսանդր 2-րդի կողմից, ավելի կենսունակ էր, քան «առանձնահատուկ ուղու մասին ֆանտազիան կամ խորհրդային փորձը»: «Ի վերջո, ճիշտ էր հենց նա, այլ ոչ թե Նիկոլայ I-ը կամ Ստալինը»:
RIA-Novosti գործակալության հաղորդմամբ, Մեդվեդևը նաև հայտարարել է, որ Ռուսաստանը զարգանալու համար պետք է ապահովի ազատություն բոլորի համար: «Չի կարելի ազատությունը թողնել հետո-ին, և չի կարելի վախենալ ազատ մարդուց, որը կարող է ինչ-որ աներևակայելի ձևով տնօրինել իր ազատությունը»,- նշել է երկրի ղեկավարը:
