Սեպտեմբերի 29-ին ՀՀ ԱԺ նախագահ Հովիկ Աբրահամյանը Ծաղկաձորում մասնակցել է «Ազգային ժողովի գավաթի» խաղարկության մրցումների եզրափակիչ փուլի բացման հանդիսավոր արարողությանը, որին ներկա էին նաև ԱԺ փոխնախագահ Էդուարդ Շարմազանովը, ՀՀ կրթության և գիտության նախարար Արմեն Աշոտյանը, ՀՀ սպորտի և երիտասարդության հարցերի նախարար Հրաչյա Ռոստոմյանը, ԱԺ պատգամավորներ, մարզպետներ, կրթության, մշակույթի և սպորտի գործիչներ:
ՀՀ ԱԺ հասարակայնության և տեղեկատվության միջոցների հետ կապերի վարչությունից «Առաջին լրատվական»-ին հայտնում են, որ «Ազգային ժողովի գավաթի» խաղարկության մրցումների եզրափակիչ փուլին մասնակցել են ՀՀ մարզային փուլերում լավագույն արդյունքներ ցուցաբերած 4-6-րդ դասարանների աշակերտները, ինչպես նաև Լեռնային Ղարաբաղի Հանրապետության պատվիրակությունը:
«Ազգային ժողովի գավաթի» խաղարկությունը, որն անց է կացվում 2001 թվականից, շուրջ 11 ուսումնական տարի ցածր դասարանների աշակերտների համար դարձել է դպրոցական առօրյայի անբաժանելի մաս և շատերի համար ճանապարհ հարթել դեպի մեծ սպորտ:
Ողջույնի խոսքով հանդես է եկել ԱԺ նախագահ Հովիկ Աբրահամյանը: «Ողջունում եմ բոլորիդ աշնանային այս գեղեցիկ օրը, որը, կարծում եմ, ի սկզբանե բոլորիս վարակել է լավ տրամադրությամբ: Համոզված եմ, որ մեր մասնակիցներն իրենց պատրաստակամությամբ ու մարզական հաջողություններով ավելի կբարձրացնեն այդ տրամադրությունը»,-ասել է խորհրդարանի ղեկավարը:
Նա նշել է, որ արդեն 11-րդ անգամ անցկացվող «Ազգային ժողովի գավաթի» խաղարկությունը ևս մի առիթ ու հնարավորություն է ուշադրություն բևեռելու մեր մատաղ սերնդին, նրա ֆիզիկական դաստիարակությանը, որովհետև, ըստ ԱԺ նախագահի, առողջ սերունդ նշանակում է և ֆիզիկապես, և հոգեպես առողջ հասարակություն, հզոր պետություն, ուժեղ բանակ:
Հովիկ Աբրահամյանը նշել է, որ թեթև աթլետիկան այն մարզաձևն է, որ իրավամբ համարվում է սպորտի թագուհի և լիարժեքորեն նպաստում առողջ մարմին ունենալուն: Ըստ ԱԺ նախագահի` մեր հայրենակիցները թե Հայաստանում, թե նրա սահմաններից դուրս ունեցել են լավ ավանդույթներ այս մարզաձևում: Նա հիշեցրեց, որ թեթև աթլետիկայի բաղադրիչներից մեկը համարվող հեռացատկի Եվրոպայի ռեկորդն առ այսօր պատկանում է մեր հայրենակից Ռոբերտ Էմիյանին, ով այժմ Հայաստանի աթլետիկայի ֆեդերացիայի նախագահն է:
Խորհրդարանի ղեկավարը նշել է, որ «Ազգային ժողովի գավաթի» խաղարկության նախընտրական փուլերն արդեն անցկացվել են Հայաստանի մարզերում և Արցախում: «Շատ ողջունելի է, որ մեր դպրոցականներն այսքան ակտիվ են մասնակցում այս մրցաշարին: Վստահ եմ, որ եզրափակիչ փուլում մրցելու են արժանավորները, հաղթելու են ուժեղագույնները»,-ասել է Հովիկ Աբրահամյանը:
Բարձր գնահատելով նման միջոցառումներն ու դրանց նշանակությունը երեխաների, դպրոցականների և ընդհանրապես մատաղ սերնդի համար` ԱԺ նախագահը պատրաստակամություն է հայտնել այսուհետ ևս աջակցել ու օժանդակել նրանց:
Այնուհետև ԱԺ նախագահ Հովիկ Աբրահամյանը պարգևատրել է «Ազգային ժողովի գավաթի» խաղարկության մրցումներում ձգումներ մրցաձևից լավագույն արդյունքներ ցուցաբերած աշակերտներին:
