Անհայտ անձինք Մոսկվայի «Դոմոդեդովո» օդանավակայանում առևանգել են Maxim ամսագրի ֆոտոմոդել, «Միսս Maxim-2012» Կարինա Գուրինին: Այս մասին LifeNews կայքին հայտնել է նրա քույրը:
Սեպտեմբերի 29-ի առավոտյան Կարինան իր քրոջ և նկարչի հետ Իսպանիայից ժամանել է Մոսկվա:
Օդանավակայանից դուրս գալուց հետո անհայտ անձինք բռնի ուժով տարել են 21- ամյա մոդելին:
«Ամեն ինչ շատ արագ տեղի ունեցավ: Ես նկարչի հետ գնում էի դեպի տաքսին, երբ հանկարծ մի ճիչ լսվեց: Դա իմ քրոջ ձայնն էր: Երբ շրջվեցինք Կարինան արդեն չկար: Այդ պահին արտասահմանյան սև գույնի մի մեքենա շատ արագ տեղից շարժվեց: Մենք չհասցրեցինք հիշել համարները»,- պատմել է Կարինայի քույրը՝ Գալինան:
Գալինան հաղորդել է, որ դիմել է ոստիկանություն, սակայն նրան ասել են, որ սպասի մինչև վաղը, եթե Կարինան չհայտնվի, ոստիկանությունը կզբաղվի նրա որոնմամբ:
