Այսօր Յալթայում տեղի կունենա ԱՊՀ կառավարությունների ղեկավարների հանդիպումը, որին մասնակցում է նաև ՀՀ վարչապետ Տիգրան Սարգսյանը:
Հանդիպման հիմնական թեման կլինի ԱՊՀ ազատ առևտրային գոտու վերաբերյալ պայմանագրի վավերացման գործընթացի արագացումը: Այս մասին հաղորդում է ИНТЕРФАКС-ը:
ՌԴ կառավարության աղբյուրի փոխանցմամբ` Ռուսաստանի, Բելառուսի և Ուկրաինայի համար այն ուժի մեջ է մտել սեպտեմբերի 20-ից: Հայաստանում վավերացման գործընթացներն ավարտվել են, որտեղ պայմանագիրը կսկսի գործել հոկտեմբերի 17-ին:
Աղբյուրի զրուցակցի փոխանցմամբ` սպասվում է, որ փաստաթուղթը ստորագրած ԱՊՀ մյուս պետությունները` Ղազախստանը, Ղրղըզստանը, Մոլդովան ու Տաջիկստանը կվավերացնեն այն մինչև տարեվերջ:
Նիստի օրակարգում ընդգրկված է 21 հարց: Վարչապետները կքննարկեն ԱՊՀ պետությունների հակաօդային պաշտպանության միասնական համակարգի զարգացմանը վերաբերող հարցեր, ֆինանսական հարցերի համալիր, այդ թվում 2013-ին ֆինանսավորման հաստատումը` պատերազմի վետերանների կյանքի որակի բարձրացման և սոցիալ-բժշկական օգնության զարգացման միջոցառումների համար: