«Խոսրովի անտառ» պետական արգելոց ՊՈԱԿ-ի Կաքավաբերդ տեղամասում բնապահպան ակտիվիստների
բացահայտումներն այս օրերին իսկական գլխացավանք են դարձել բնապահպանության նախարարի և նախարարության համար:
Բնապահպան ակտիվիստ Մարիամ Սուխուդյանի և բնապահպան, լուսանկարիչ Եղիա Ներսիսյանի տարածած տեսանյութերը, որոնցում նրանք հատուկ պահպանվող տարածքներում ցույց են տալիս Կարմիր գրքում գրանցված կենդանիների` բեզոարյան այծի գլուխ, դրա ներքին օրգանները, կովկասյան արջի գլուխ, մորթված նապաստակ, տարաբնույթ խոսակցությունների առարկա են դարձել:
Բնապահպան ակտիվիստների տարատեսակ մեղադրանքներին, թե բնապահպանության նախարարությունն անգործության է մատնված` Խոսրովի անտառում թույլ տալով որս իրականացնել, բնապահպանության նախարարությունից արձագանքում են, թե դեռ քննությունը կպարզի` այդ կենդանիները գտնվել են «Խոսրովի անտառ» պետական արգելոց ՊՈԱԿ-ի տարածքո՞ւմ, թե՞ ոչ:
Հարց է առաջանում` եթե նույնիսկ այդ կենդանիները սպանվել են «Խոսրովի անտառ» պետական արգելոց ՊՈԱԿ-ի տարածքներից դուրս, նրանց սպանդն արդարացվա՞ծ է: Այս հարցով «Առաջին լրատվական»-ը զրուցեց ՀՀ բնապահպանության նախարարության աշխատակազմի ղեկավարի տեղակալ Աշոտ Ավալյանի հետ: Վերջինս նշեց, որ հատուկ պահպանվող տարածքները բնապահպանության նախարարության ենթակայության տակ գտնվող տարածքներ են, որոնցում յուրաքանչյուր խախտման համար պատասխանատու է բնապահպանության նախարարությունը: Այդ տարածքներում գործում է հատուկ ռեժիմ՝ մուտք գործելը գրեթե անհնար է, քանի որ շուրջօրյա հերթապահություն է կատարվում, տեսչական աշխատանքներ են իրականացվում և փորձ է արվում բացառել որսագողության դեպքերը:
Ըստ նրա՝ նախարարությունը փորձում է կենդանիների սպանդի տեղը որոշել, քանի որ այստեղ վնասի փոխհատուցման հարց կա. եթե որսագողությունը կատարվել է հատուկ պահպանվող տարածքում, ապա հանցագործության ծանրության աստիճանը հինգ անգամ մեծանում է:
«Օրինակ՝ եթե ոչ հատուկ պահպանվող տարածքներում բեզոարյան այծի որսն արժե 3 մլն դրամ, ապա հատուկ պահպանվող տարածքում այն արժե 15 մլն»,- հստակեցրեց Աշոտ Ավալյանը:
Անդրադառնալով բնապահպանության նախարար Արամ Հարությունյանի հրամանով ստեղծված աշխատանքային խմբի աշխատանքներին՝ Աշոտ Ավալյանն ասաց, որ երեկվանից իրենց է միացել նաև ոստիկանությունը, համատեղ փորձում են գտնել կոնկրետ տարածքները, որտեղ կենդանիները սպանվել են:
«Քանի որ բնապահպանները չեն ցանկանում մեզ աջակցել, մենք մեր ուժերով ենք փորձում հայտնաբերել: Առաջին խնդիրն է հայտնաբերել, թե որտեղ է կատարվել դեպքը, իսկ երկրորդը՝ պարզել իրականացնողներին»,- նշեց բնապահպանության նախարարության աշխատակիցը:
Նա բնապահպանների ֆանտազիայի արդյունքը համարեց այն խոսակցությունները, թե այդ տարածքներում որս են կազմակերպում օլիգարխները.
«Բնության մեջ այդպիսի բան չի լինում, շատ դժվար է այդ տարածքներ մուտք գործելը: Ես նաև կասկածում եմ` ինչպե՞ս ստացվեց, որ բնապահպանները մտան և մի տեղ արջ տեսան, մի տեղ` լեշ, այծ, նապաստակ: Օլիգարխների մասին էլ խոսք լինել չի կարող: Տեսնենք, թե իրականում դեպքը եղե՞լ է, թե՞ ոչ: Քննությունն ընթացքի մեջ է, մոտակա օրերին արդեն ամեն ինչ կպարզվի»:
