2012 թվականի ամառային տրանսֆերային պատուհանը սպասվածի պես թեժ ստացվեց: Բազմաթիվ հաջողված ու տապալված բանակցություններ, կանխատեսելի ու անակնկալ տեղափոխություններ, ձեռնտու և արդյունավետ գործարքները, անսպառ միլիոններ… 1in.am Sport-ը շարունակում է իր «խոշորացույցի» տակ առնել եվրոպական առաջատար առաջնությունների գրանդների և տրանսֆերային շուկայում առավել արդյունավետ աշխատանք կատարած ակումբների ձեռքբերումներն ու կորուստները` 2012 թվականի ամառային տրանսֆերային պատուհանի ընթացում:
Իսպանիա, «Բարսելոնա»
2011/12թթ. մրցաշրջանում Մադրիդի «Ռեալ»-ն ի վերջո կարողացավ շրջանցել «Բարսելոնա»-ին ու հռչակվել Իսպանիայի չեմպիոն: Թիմը չկարողացավ նվաճել նաև ՉԼ գավաթը՝ կիսաեզրափակիչում զիջելով «Չելսի»-ին: Չնայած թիմի համար երկու կարևորագույն մրցաշարերում անհաջող ելույթներին, «Բարսա»-ն հրաշալի կազմ ուներ, իսկ Լիոնել Մեսին ուղղակի տիեզերական ֆուտբոլ էր ցուցադրում:
Մրցաշրջանի ավարտից հետո ակումբում մարզչական փոփոխություն տեղի ունեցավ: Պեպ Գվարդիոլան լքեց «Բարսելոնա»-ն, իսկ նրա տեղը զբաղեցրեց Տիտո Վիլանովան: «Բարսա»-ն ակտիվ չէր 2012 թվականի ամառային տրանսֆերային պատուհանի ժամանակ, քանի որ ընդհանուր առմամբ դրա կարիքը չկար: Պետք էր համալրել միայն պաշտպանության ձախ եզրն ու հենակետային կիսապաշտպանի դիրքը, քանի որ կատալոնական ակումբից հեռացել էր Սեյդու Կեյտան: Ակումբի ղեկավարությունը հաջողությամբ կատարեց անհրաժեշտ ձեռքբերումները, իսկ թիմը հիանալի է մեկնարկել ընթացիկ մրցաշրջանում:
Խորդի Ալբա
Միչ ֆուտբոլի Եվրոպայի 2012 թվականի առաջնության ժամանակ Խորդի Ալբան փայլում էր Ուկրաինայի ու Լեհաստանի խաղադաշտերում, «Բարսելոնա»-ն ու «Վալենսիա»-ն համաձայնության եկան պաշտպանի տրանսֆերի հարցում: Տեղափոխությանը դեմ չէր նաև ֆուտբոլիստը: Արագությամբ, ճկունությամբ, գրագետ դիրքային խաղով աչքի ընկնող պաշտպանը արդյունավետ է գործում նաև հարձակվելիս: Ինչպես և սպասվում էր, «Բարսա»-ի ակադեմիայի ներկայացուցիչն արագորեն հարմարվեց կատալոնական ակումբի խաղաոճին: «Վալենսիա»-ն պաշտպանի տրանսֆերի դիմաց ստացավ 14 մլն եվրո, իսկ Ալբան իր նոր ակումբի հետ 5 տարվա պայմանագիր ստորագրեց: «Բարսելոնա»-ում ես սովորել եմ ֆուտբոլի փիլիսոփայյությունը՝ խաղալ արագ և մտածել մինչև գնդակ ստանալը: Ուրախ եմ, որ վերադառնում եմ հարազատ ակումբ»,- հայտարարել է 23-ամյա պաշտպանը: Ալբան մեկնարկային խաղն անցկացրեց օգոստոսի 19-ին՝ «Ռեալ Սոսյեդադ»-ի հետ խաղում: Ալբան «Բարսելոնա»-ի կազմում մասնակցել է 3 հանդիպման:
Ալեքսանդր Սոնգ
Արսեն Վենգերի թիմի հենասյուներից մեկը՝ Ալեքսանդր Սոնգը, 2012 թվականի ամառային տրանսֆերային պատուհանի ժամանակ նույնպես վայր դրեց իր զինանոցն ու համալրեց Լոնդոնից Կատալոնիա տեղափոխված խաղացողների շարքը: Ամրակազմ, ուժային ֆուտբոլ ցուցադրող հենակետայինը, որը հաջողությամբ կարող է խաղալ նաև պաշտպանության կենտրոնում, փոխարինեց թիմից հեռացած Սեյդու Կեյտային: «Ես ցանկանում եմ հաղթել, իսկ «Բարսելոնա»-ն հաղթողների թիմ է: Ես իմ մարզական կարիերայում դեռ ոչ մի տիտղոս չեմ նվաճել, իսկ հիմա հիանալի հնարավորություն եմ ստացել լրացնել այդ բացը: Նոր ակումբում ամեն ինչ դուր է գալիս ինձ: Ցանկանում եմ դառնալ թիմի մասնիկն ու իմ ներդրումն ունենալ թիմի հաջողություններում»,- ասել է Սոնգը:
«Բարսելոնա»-ն Սոնգի տրանսֆերի դիմաց «Արսենալ»-ին 19 մլն եվրո վճարեց, իսկ կիսապաշտպանի հետ 5 տարվա պայմանագիր ստորագրեց: Սոնգը կատալոնական ակումբի կազմում 2 խաղ է անցկացրել:
Թիմից հեռացել են Սեյդու Կեյտան («Դալիան Աերբին», ազատ գործակալ), Իբրահիմ Աֆելայը («Շալկե», վարձավճար), Կեյրիսոն («Կորիտիբա», ազատ գործակալ), Էնրիկեն («Պալմերիաս», ազատ գործակալ):
Ծախս՝ 33 մլն եվրո, եկամուտ՝ 0.7 մլն եվրո:
