Հայաստանի ազգային հավաքականի ու ուկրաինական «Շախտյոր»-ի կիսապաշտպան Հենրիկ Մխիթարյանը մեկնաբանել է Ուկրաինայի գավաթի 1/8-րդ եզրափակչի վիճակահանության արդյունքները:
Նշենք, որ Մխիթարյանի թիմի մրցակիցը լինելու է «Գովերլա»-ն:
«Չեմ կարող ասել, թե սպասում էի, որ «Գովերլա»-ն է լինելու մեր մրցակիցը: Սակայն մեծ հաշվով տարբերություն չկա. պետք է խաղալ ցանկացած մրցակցի դեմ, որը բաժին կհասնի: Գավաթի խաղարկություններում բոլոր թիմերն էլ պայքարում են: Կարծում եմ՝ մեզ համար հեշտ չի լինի հատկապես այն պատճառով, որ խաղալու ենք Ուժգորոդում: Այն, որ հեռու է, մեզ չի հետաքրքրում(Ծիծաղում է): Կարևորագույնն այն է, որ մենք լավ պատրաստվենք խաղին ու ամեն ինչ անենք՝ հաղթելու համար: Այսպես նաև քառորդ եզրափակչում, կիսաեզրափակչում:
Լսել եմ, որ ասում են, թե «Դինամո»-ին հաղթելուց հետո հակառակորդ չունենք լիգայում, բայց այդպես պետք չէ ասել: Յուրաքանչյուր թիմի դեմ պայքար մղելուց առաջ պատրաստվում ենք 100 տոկոսով: Կարծում եմ՝ ինչքան մոտենում է եզրափակիչը, այնքան հետաքրքիր ու դժվար է դառնում»,- «Շախտյոր»-ի պաշտոնական կայքը փոխանցում է Մխիթարյանի խոսքերը:
