Հոկտեմբերի 2-9-ը Երևանում կմեկնարկի «ՀայՖեստ» թատերական 10-րդ փառատոնը: Այս տարի փառատոնը կդառնա 10 տարեկան, սակայն դա փառատոնի վրա ոչնչով չի անդրադառնա:
«Մենք մեծ ենք, սակայն դա չենք զգում: Պետությունն էլ չի զգում, որ մենք մեծ ենք: Ուրախալի է: Չենք կարծում, թե հատուկ պետք է նշենք այս հոբելյանը: Ինձ համար նույնն է, ինչ, օրինակ, 6-րդ կամ 9-րդ փառատոնը»,- կատակով ասաց «ՀայՖեստի» նախագահ Արթուր Ղուկասյանը:
Փառատոնի բացումը տեղի կունենա Ստանիսլավսկու անվան ռուսական դրամատիկական թատրոնում` ճապոնական աշխարհահռչակ հարվածային գործիքների «Դադադադան Տենկո» խմբի բեմադրությամբ:
Ինչպես տեղեկացրեց փառատոնի նախագահը, այս տարի ևս նախատեսվում է կազմակերպել մշակութային պլատֆորմ Վրաստանի հետ: Սպասվում են հանդիպումներ, հյուրեր, հրավիրյալ խմբերի գեղարվեստական ղեկավարների հետ կկազմակերպվեն վարպետության դասընթացներ, Ազնավուրի հրապարակում և Հյուսիսային պողոտայում կլինեն բացօթյա ներկայացումներ` Պորտուգալիայից և Ֆրանսիայից ժամանած խմբերի մասնակցությամբ:
Այս տարի փառատոնը սոցիալապես անապահով երեխաների համար կկազմակերպի արտ-թերապիայի դասընթացներ` Հոլանդիայից և Ֆրանսիայից ժամանած մասնագետների հետ:
«ՀայՖեստին» կմասնակցեն 25 թատերական ու պարային խմբեր` 18 երկրներից, այդ թվում` Ճապոնիայից, Եվրոպայից, Իրանից, Վրաստանից, Իսրայելից, Ղազախստանից, ԱՄՆ-ից, Սինգապուրից:
Ինչ վերաբերում է հայաստանյան թատրոններին, ապա, ըստ Ղուկասյանի, հիմնականում կմասնակցեն նախորդ տարիներին փառատոնում ներկայացված թատրոնները՝ «Միհրը», Պատանի հանդիսատեսի թատրոնները:
Ընդհանուր առմամբ` Երևան կժամանի շուրջ 200 հյուր:
Never Miss կարգախոսը կրող այս տարվա փառատոնի կազմակերպմանն աջակցում է մշակույթի նախարարությունը:
«Մշակույթի նախարարությունը հատկացրել է 33 մլն դրամ, 1 մլն դրամ հատկացրել են նախագահականից: Երևանի քաղաքապետարանը ևս խոստացել է գումար տրամադրել»,- հայտնեց Արթուր Ղուկասյանը:
Լուսանկարը՝ PanARMENIAN Photo-ի
