Իրանական İRİNN հեռուստաալիքի փոխանցմամբ՝ «Սրբազան պաշտպանության» շաբաթվա շրջանակներում Իրանում ցուցադրվել է սեփական արտադրության երկու նոր զրահամեքենա: Howeizeh թրթուրավոր զրահատրանսպորտի և Tala’eeyeh զրահապատ տրանսպորտային միջոցի ցուցադրման արարողությանը ներկա է գտնվել նաև Իրանի պաշտպանության նախարար Ահմադ Վահիդին:
Վերջինս հայտարարել է, որ ներկայումս Իրանն աշխատում է այն ողղությամբ, որ բանակային մեքենաները դառնան ավելի թեթև, արագ և ունենան մեծ անցունակություն: Վահիդիի խոսքերով՝ Howeizeh-ը միջին քաշի զրահամեքենա է, որը հեշտությամբ կարելի է փոխադրել ինքնաթիռով կամ ուղղաթիռով: Այն կարող է գործածվել ոչ միայն բանակում, այլև սահմանապահ զորքերում՝ թմրանյութի ապօրինի շրջանառման դեմ պայքարում և անգամ քաղաքացիական նպատակներով:
Իսկ ինչ վերաբերում է Tala’eeyeh-ին, ապա ըստ Վահիդիի՝ այն ունի եզակի հնարավորություն. նրա բոլոր անիվներն ինքնուրույն են աշխատում, ինչը զգալիորեն բարձրացնում է նրա անցունակությունը: Իրանը «Սրբազան պաշտպանության» շաբաթվա շրջանակներում ներկայացրել էր նաև զենիթա-հրթիռային նոր համալիրներ: