«Արմենիա միջազգային օդանավակայաններ» ընկերությանն ունեցած ընթացիկ պարտքը «Արմավիա» ավիաընկերությունը ժամանակին վճարել է, նախորդ շաբաթ փոխանցված գումարն արդեն հաշվեհամարին է, և խնդիրը հարթված է: Ինչպես «Առաջին լրատվական»-ին հայտնեց «Արմավիա»-ի լրատվական ծառայության ղեկավար Նանա Ավետիսովան, այս շաբաթվա ընթացքում կատարվելիք վճարումը չի ուշանա, քանի որ շաբաթ օրն աշխատանքային է, և փոխանցումը ժամանակին տեղ կհասնի:
««Արմավիան» պարտավորվում է, որ առաջիկայում ուշացում չի լինի»,- նշեց Ն. Ավետիսովան:
«Զվարթնոց»-ի լրատվական ծառայությունից մեզ հաստատեցին, որ փոխանցումը տեղ է հասել, և այս պահին խնդիր չկա:
Հիշեցնենք, որ սեպտեմբերի 20-ին «Զվարթնոց» օդանավակայանը դադարեցրել էր «Արմավիա» ավիաընկերության չվերթների սպասարկումը՝ կուտակված պարտքերի պատճառով, այնուհետև` գումարի փոխանցումը միայն տոնական օրերի պատճառով հաշվեհամարին չերևալու հավաստիացումներից հետո, «Զվարթնոցը» ՀՀ Անկախության տոնակատարությունների պատվին վերականգնեց ազգային ավիափոխադրողի չվերթների սպասարկումը: