Կիրակի օրը ավելի քան 400 մարդ է հավաքվել Թեհրանում Ֆրանսիայի դեսպանատան առջև` իրենց վրդովմունքը հայտնելու «Մուսուլմանների անմեղությունը» ֆիլմի և Մուհամմեդ մարգարեի ծաղրանկարները ֆրանսիական ամսագրերից մեկում հրատարակելու կապակցությամբ, հայտնում է France-Presse գործակալությունը:
Թեհրանում Ֆրանսիայի դեսպանատան առջև տեղի ունեցող ցույցերը, որոնց մասնակցում են ուսանողներ, մի քանի օր է` չեն դադարում: Ցույցի մասնակիցները գոչում են «Մահ Ամերիկային», «Մահ Իսրայելին», «Մահ Մեծ Բրիտանիային», «Մահ Ֆրանսիային»: Նրանք պահանջում են պատժել Մուհամմեդ մարգարեին ծաղրողներին:
Այս պահին ցուցարարների ձերբակալման կամ տուժածների մասին տեղեկությունների չեն հաղորդվում:
Ինչպես տեղեկացնում է տեղեկատվական գործակալությունը, Ֆրանսիայի դեսպանատունն այսօր Իրանի մայրաքաղաքում ունի ամենամեծ դիվանագիտական ներկայացուցչությունը:
Ավելի վաղ Թեհրանում իր դեսպանատունն էր փակել Կանադան, իսկ 2011 թվականին` Մեծ Բրիտանիան: ԱՄՆ-ը դեռ 1980-ականներից Իրանում դեսպանատուն չի ունեցել:
Շաբաթվա սկզբից ի վեր ուսանողների ցույցերի կապակցությամբ իշխանությունները ստիպված էին ուժեղացնել անվտանգության միջոցառումներ Ֆրանսիայի դեսպանատան մոտ:
