Իրանական IRNA լրատվական գործակալության փոխանցմամբ՝ Իրանի արտգործնախարար Ալի Աքբար Սալեհին հայտարարել է, որ Իրանն անդրտարածաշրջանային երկրներին թույլ չի տվել իրենց կամքը թելադրել տարածաշրջանում.
«Անհրաժեշտ է սիրիական ճգնաժամը կարգավորել բացառապես խաղաղ ճանապարհով: Ռազմական ու ֆինանսական հզորություն ունեցող որոշ երկրներ փորձում են իրենց կարգուկանոնը հաստատել տարածաշրջանում: Այդպիսի երկրներից մեկը Ֆրանսիան է, որը փորձում է խոչընդոտել սիրիական ճգնաժամի կարգավորման վերաբերյալ բանակցություններին Իրանի մասնակցությունը:
Եգիպտոսի նախագահի հետ իմ հանդիպումից անմիջապես անց Ֆրանսիայի արտգործնախարար Լորան Ֆաբիուսը նույնպես հանդիպեց Մուհամեդ Մուրսիի հետ: Երկար ժամանակ Արևմուտքն իրականացնում է միջազգային հանրության աչքում Իրանի վարկաբեկման ու համաշխարհային արենայում նրա մեկուսացման քաղաքականություն:
Սակայն անհնար է անտեսել Իրանի իրական դիրքորոշումը, որովհետև Իրանը տարածաշրջանի առաջատար և ազդեցիկ երկրներից մեկն է: Ֆրանսիան իր դիրքորոշումն է պնդում, սակայն նա վաղ թե ուշ ստիպված կլինի խոստովանել տարածաշրջանում Իրանի դերն ու ազդեցությունը»:
