Ադրբեջանական APA լրատվական գործակալության փոխանցմամբ՝ Ադրբեջանի փոխարտգործնախարար Արազ Ազիմովը լրագրողների հետ զրույցում անդրադարձել է տխրահռչակ Ռամիլ Սաֆարովի արտահանձնման ու ներման խնդրին՝ քննադատելով ԵԱՀԿ Մինսկի խմբի համանախագահող երկրներին՝ այդ հարցում որդեգրած դիրքորոշման համար.
«ԵԱՀԿ Մինսկի խմբի համանախագահներն ու Հայաստանը բացասաբար ընդունեցին Ռամիլ Սաֆարովի հարցը: Այդ կապակցությամբ տարածած իրենց հայտարարության մեջ համանախագահներն ընդգծեցին, որ այդ հարցից հետո կբարդանա Ղարաբաղյան հակամարտության խաղաղ կարգավորումը: Սակայն ես հայտարարում եմ, որ այդ գործընթացը որևէ զարգացում չէր ապրել մինչև Սաֆարովի հարցը:
Մի՞թե հայերը մեզ որևէ հույս են տվել հակամարտության կարգավորման վերաբերյալ: Համանախագահները միայն ժամանակ են շահել, գնացել են այնտեղ, եկել են այստեղ, սակայն, անկեղծ ասած, լուրջ աշխատանք չեն կատարել: Ինչ-որ մեկին պատրվակ էր պետք, և ահա նրանք գտել են դա՝ Ռամիլ Սաֆարովի հարցը»:
