Պաղեստինի ազգային վարչակազմի ղեկավար Մահմուդ Աբասը կարող է հույս դնել Ռուսաստանի աջակցության վրա, երբ դիմի ՄԱԿ-ի Գերագույն ասամբլեա Պաղեստինին ՄԱԿ-ի դիտորդ պերտության կարգավիճակ տրամադրելու հարցով: Այս մասին ITAR-TASS-ին հայտնել է ՄԱԿ-ում Ռուսաստանի մշտական ներկայացուցիչ Վիտալի Չուրկինը:
«Մեր դիրքորոշումն այդ հարցում սկզբունքային է. Մենք աջակցում ենք այդ ուղղությամբ պաղեստինցիների ցանկացած ձեռնարկումի… Եթե նրանք ցանկանան բարձրացնել այդ հարցը (դիտորդ պետության կարգավիճակ ստանալու.- 1in.am) Գերագույն ասամբլեայի նստաշրջանում, մենք նրանց կաջակցենք»,- ասել է Ռուսաստանի ներկայացուցիչը:
Գերագույն ասամբլեայում Պաղեստինին աջացելու պատրաստակամության մասին հայտարարել է նաև ՄԱԿ-ում Չինաստանի մշտական ներկայացուցիչ Լի Բաոդուինը:
Հիշեցնենք. Մահմուդ Աբասը հայտարարել է, որ սեպտեմբերի 27-ին Գերագույն ասամբլեայի նիստում ելույթ կունենա Պաղեստինը որպես այդ կազմակերպության դիտորդ պետություն ճանաչելու կոչով: ՄԱԿ-ի գրասենյակից նշել են, որ ինքնավարությունը կարող է հաջողության հնարավորություն ունենալ, եթե ստանա 193 անդամ երկրների աջակցությունը:
Սակայն կազմակերպության լիարժեք անդամ դառնալու մասին որոշումը կարող է ընդունել միայն ՄԱԿ-ի ԱԽ-ն: Անցյալ աշնանը պաղեստինցինիերի նման հայցը մերժվեց ԱՄՆ-ի կողմից ԱԽ մյուս անդամների վրա ճնշումների պատճառով: Չնայած դրան՝ Պաղեստինը հայտարարում է, որ պատրաստ է շարունակել պայքարն անկախության համար:
