«ՀՀ անկախության տարեդարձը ճշմարտության իմ վերջնական պահն է: Այս պահը կարող է սահմանել և զատորոշել մեզանից յուրաքանչյուրին կամ էլ առավելագույնս մշակել մարդկային ընդհանուր հայտարարներ». այսօր լրագրողների հետ հանդիպման ժամանակ հայտարարեց «Ժառանգություն» կուսակցության ղեկավար Րաֆֆի Հովհաննիսյանը՝ շնորհավորելով ՀՀ անկախության քսանմեկերորդ տարեդարձը:
Րաֆֆի Հովհաննիսյանն ասաց, որ հետագա 100 օրը կնվիրի Հայաստանի ժամանակակից պետության նախագահության՝ քաղաքացիական համոզիչ թեկնածության ձևավորմանը: Ըստ նրա՝ նա, ով կդառնա 2013 թվականի արշալույսին նախատեսված այդ հավաքական պայքարի կրողը՝ ինքը, թե մեկ ուրիշը, պետք է կյանքի կոչի մի քանի հիմնական պահանջներ:
Րաֆֆի Հովհաննիսյանը ներկայացրեց, թե որոնք են այդ պահանջները, նա խոսեց արտաքին մարտահրավերների, երկրի առջև ծառացած խնդիրների և իր երազած Հայաստանի համար, այն Հայաստանի, որի մասին երազում է յուրաքանչյուր հայ Հայաստանում, թե Հայաստանի սահմաններից դուրս:
Եզրափակելով իր խոսքը՝ նա ասաց, որ լրագրողների բոլոր հարցերին կպատասխանի հոկտեմբերի 1-ին Երևանի «Կոնգրես» հյուրանոցում: Նա նաև հստակեցրեց, որ ամեն ինչ անելու է իր թեկնածության առաջադրման, եթե պետք լինի՝ բացառման համար:
Լուսանկարը՝ PanARMENIAN Photo-ի
