Forbes հեղինակավոր ամսագիրը հրապարակել է ԱՄՆ ամենահարուստ 400 մարդկանց ցուցակը: Արդեն 19-րդ անգամ ամենաառաջին տողն այդ ցուցակում զբաղեցնում է Microsoft ընկերության տնօրեն Բիլ Գեյթսը: Նրա կարողությունը գնահատվում է 66 մլրդ դոլար, ինչը նախորդ տարվա համեմատ 7 մլրդ-ով ավելի է:
Ամենահարուստների ցուցակում երկրորդ հորիզոնականում է Berkshire Hathaway հոլդինգի 82-ամյա ղեկավար Ուորեն Բաֆֆեթը: Մեկ տարվա ընթացքում նա վաստակել է 7 մլրդ դոլար, և այժմ նրա կարողությունը գնահատվում է 46 մլրդ դոլար: Եռյակը եզրափակում է Oracle ընկերության հիմնադիր և գործադիր տնօրեն Լոուրենս Էլլիսոնը, ում բանկային հաշիվներին նստած է 41 մլրդ դոլար: Չորրորդ և հինգերորդ հորիզոնականներում են Չարլզ և Դևիդ Կոխ եղբայրները` Koch Industries-ի տերերը, որոնցից յուրաքանչյուրի հաշվին կա 31 մլրդ դոլար:
Այսպիսով՝ նախորդ տարվա հետ համեմատած՝ հնգյակը մնացել է նույնությամբ, սակայն փոփոխություններ են տեղի ունեցել «ոսկե» տասնյակում: Ամենահարուստ ամերիկացիների ցուցակում «ոսկե տասնյակից» դուրս է թռել խաղային մագնատ Շելդոն Ադելոսնը` այս տարի հայտնվելով 12-րդ հորիզոնականում, ինչպես նաև հայտնի ֆինանսիստ Ջորջ Սորոսը` 15-րդ հորիզոնական: Իսկ Google ընկերության հիմնադիրը` Սերգեյ Բրինը հայտնվել է 13-րդ տեղում:
Ամսագիրը նշում է, որ այս տարի մեծ կորուստներ է ունեցել Facebook ընկերության հիմնադիր Մարկ Ցուկերբերգը` բորսայում իր ընկերության բաժնետոմսերի անհաջող վաճառքի հետ կապված: Նրա ունեցվածքը գրեթե կիսով չափ կրճատվել է, ինչի արդյունքում նա 14-րդ հորիզոնականից այս տարի հայտնվել է 36-րդ տեղում:
Ի դեպ, այս տարվա վարկանշային աղյուսակում ներառվել է 45 կին` երեք անգամ ավելի, քան նախորդ տարվա ցուցակում էր ընդգրկված:
